ဖိလစ်ပိုင်က အမေရိက၏ တိုက်ဖွန်းဒုံးကျည်စနစ်ကို ဝယ်ယူမည်

ဖိလစ်ပိုင်သည် ၎င်း၏ ရေပိုင်နက်အကျိုးစီးပွားများကို ကာကွယ်ရန် အမေရိက တိုက်ဖွန်းဒုံးကျည်စနစ်ကို ဝယ်ယူရန် စီစဉ်ထားသည်ဟု တနင်္လာနေ့တွင် ပြောဆိုခဲ့ရာ ဒေသတွင်း လက်နက်ပြိုင်ဆိုင်မှုတွင် တရုတ်က သတိပေးရသည်အထိ ဖြစ်စေခဲ့သည်။

အမေရိကန်စစ်တပ်သည် ၎င်း၏ ရေရှည် မဟာမိတ်နှင့် နှစ်စဉ် ပူးတွဲစစ်ရေးလေ့ကျင့်မှုများ ပြုလုပ်ရန်အတွက် တာလတ်ပစ် ဒုံးကျည်စနစ်ကို ယခုနှစ်အစောပိုင်းက ဖိလစ်ပိုင်၌ ဖြန့်ကြက်ခဲ့သည်။ ထို့အပြင် ယင်းလုပ်ရပ်သည် အာရှ ဒေသကို မတည်မငြိမ်ဖြစ်စေသည်ဟု ပေကျင်းက ဝေဖန်နေသည့်ကြားမှပင် ဒုံးစနစ်ကို ဖိလစ်ပိုင်တွင် ထားရစ်ခဲ့ရန် ဆုံးဖြတ်ခဲ့သည်။

ဒုံးကျည်စနစ်၏ လုပ်ဆောင်နိုင်စွမ်း၊ ကျွန်းစုကာကွယ်ရေး အကောင်အထည်ဖော်မှုဆိုင်ရာ မိမိတို့၏ အယူအဆနှင့် ကိုက်ညီသော စွမ်းဆောင်ရည်တို့ကြောင့် ဒုံးကျည်စနစ်ကို ဝယ်ယူသွားမည်ဖြစ်သည်ဟု တနင်္လာနေ့က သတင်းစာရှင်းလင်းပွဲတွင် ဖိလစ်ပိုင် ကြည်းတပ် အကြီးအကဲ ဒုတိယဗိုလ်ချုပ်ကြီး ရွိုင်ဂါလီဒိုက ပြောကြားခဲ့သည်။

အမေရိကန်ဒုံးကျည်စနစ်ကို ဖိလစ်ပိုင်တွင် ထားရှိခြင်းသည် ပေကျင်းကို ဒေါသထွက်စေခဲ့သည်။ တရုတ်ရေတပ်နှင့် ကမ်းရိုးတန်းစောင့်တပ်တို့သည် တောင်တရုတ်ပင်လယ်တွင် အငြင်းပွား သောင်ခုံများ၊ ရေပြင်နယ်နိမိတ်များနှင့် ပတ်သက်၍ မကြာခင်လများအတွင်းက ဖိလစ်ပိုင်နှင့် ထိပ်တိုက်တွေ့မှုများစွာဖြစ်ခဲ့သည်။

၂၀၂၂ ခုနှစ်တွင် ဖိလစ်ပိုင်သမ္မတ ဖာဒီနန်မားကို့စ် စတင်တာဝန်ယူခဲ့ပြီးချိန်မှစကာ ကာလကြာရှည် စာချုပ်ဝင်မဟာမိတ်များဖြစ်သော မနီလာနှင့် ဝါရှင်တန်တို့၏ ကာကွယ်ရေးဆိုင်ရာ ပူးပေါင်းဆောင်ရွက်မှုကို ပိုမိုနက်ရှိုင်း စေခဲ့ပြီး ပေကျင်း၏ တောင်တရုတ်ပင်လယ်ပိုင်ဆိုင်မှုရပ်တည်ချက်ကို တုန့်ပြန်လာခဲ့သည်။

ဒုံးကျည်စနစ် ဝယ်ယူမည့် ဆုံးဖြတ်ချက်နှင့်ပတ်သက်၍ တနင်္လာနေ့တွင် တရုတ်နိုင်ငံက ရန်စသည့် အန္တရာယ်ရှိသည့် လုပ်ရပ်အဖြစ် ချက်ချင်းဆိုသလို ရှုတ်ချခဲ့ပြီး လက်နက်ပြိုင်ဆိုင်မှုကို ပေါ်ပေါက်လာစေနိုင်သည်ဟု သတိပေးခဲ့သည်။

“သူ့ပြည်သူတွေနဲ့ အရှေ့တောင်အာရှဒေသ ပြည်သူတွေရဲ့ သမိုင်းကြောင်းအပြင် ဒေသတွင်းလုံခြုံရေးအတွက် အလွန်တရာ တာဝန်မဲ့တဲ့ ရွေးချယ်မှုပါ” ဟု နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မောနင်း က တနင်္လာနေ့တွင် ပြောဆိုခဲ့သည်။

Ref: စီအင်န်အေ