ယနေ့ ဒီဇင်ဘာ (၁၂)ရက် ညနေ(၅)နာရီတွင် ယှဉ်ပြိုင်ကစားကြမည့် အာဆီယံမစ်ဆူဘီရှီဖလား အုပ်စုအဆင့် ဒုတိယပွဲဖြစ်စဉ်၌ မြန်မာအသင်းခေါင်းဆောင် အပြောင်းအလဲဖြစ်ဖွယ်ရှိနေသည်ဟု သိရသော်လည်း အတည်ပြုနေဆဲဖြစ်သည်။
ဖိလစ်ပိုင်-မြန်မာ ပွဲစဉ်အတွက် ယမန်နေ့ ဒီဇင်ဘာ (၁၁)ရက်ပြုလုပ်သည့် ပွဲကြိုသတင်းစာရှင်းလင်းပွဲတွင် နည်းပြချုပ် ဦးမျိုးလှိုင်ဝင်းနှင့် ကွင်းလယ်ကစားသမား လွင်မိုးအောင်တို့ တက်ရောက်ပြောကြားခဲ့ပြီး အသင်းခေါင်းဆောင် မောင်မောင်လွင် တက်ရောက်ခဲ့ခြင်းမရှိသည်ကို တွေ့ရသည်။
မြန်မာအသင်းခေါင်းဆောင် မောင်မောင်လွင်အနေဖြင့် အင်ဒိုနီးရှားနှင့် ကစားသည့် ပွဲစဉ်အပြီး ပရိတ်သတ်အားရိုင်းစိုင်းစွာပြုမှု ဆက်ဆံခဲ့သည့်အပေါ်မြန်မာနိုင်ငံ ဘောလုံးအဖွဲ့ချုပ်ဥက္ကဋ္ဌ ဦးဇော်ဇော်က အရေးယူပေးမည်ဟု ကွင်းအတွင်း ပရိသတ်တွေကို အသိပေးတောင်းပန်ခဲ့ရသေးသည်။
ယနေ့ပွဲစဉ်အတွင်း မြန်မာအသင်းအနေဖြင့် ဖိလစ်ပိုင်အသင်းအား အနိုင်ကစားရန် အရေးကြီးပြီး ရှုံးနိမ့်ခဲ့မည်ဆိုပါက အုပ်စုအဆင့်ကနေ ထွက်ရန် ရာခိုင်နှုန်းများနေသည်။