မန္တလေးငလျင်ကြီးဒဏ်ကြောင့် နေပြည်တော်နှင့် မန္တလေးမြို့တို့မှ ထိခိုက်ဒဏ်ရာရသူများအား ဘူတန်နိုင်ငံနှင့် အိန္ဒိယနိုင်ငံတို့မှ အရေးပေါ်ဆေးအဖွဲ့ဝင်များက ကျန်းမာရေးစောင့်ရှောက်မှုလုပ်ငန်းများအား ကျန်းမာရေးဝန်ကြီးဌာနမှဝန်ထမ်းများနှင့်အတူ ပူးပေါင်းဆောင်ရွက်ပေးလျက်ရှိကြောင်း သိရသည်။
ဘူတန်နိုင်ငံမှအရေးပေါ်ဆေးအဖွဲ့သည် နေပြည်တော်၊ ပျဥ်းမနားမြို့၊ ပေါင်းလောင်းအားကစားကွင်းရှိ ယာယီဆေးရုံတွင် ကျန်းမာရေးဝန်ကြီးဌာနကဆောင်ရွက်လျက်ရှိသော ငလျင်ဘေးအရေးပေါ်ကျန်းမာရေးစောင့်ရှောက်မှုလုပ်ငန်းများအဖြစ် ငလျင်ဒဏ်ကြောင့် ထိခိုက်ဒဏ်ရာရရှိသူများအား ဆေးကုသပေးရာ၌ ပူးပေါင်းပါဝင်ဆောင်ရွက်လျက်ရှိကြောင်း သိရသည်။
ထို့ပြင် အိန္ဒိယနိုင်ငံမှအရေးပေါ်ဆေးအဖွဲ့သည် မန္တလေးတိုင်း၊ ချမ်းမြသာစည်လေယာဥ်ကွင်းဟောင်းရှိ ယာယီဆေးရုံ၌ ငလျင်ဒဏ်ကြောင့်ထိခိုက်ဒဏ်ရာရသူများအား ဆေးကုသပေးရာတွင် ကျန်းမာရေးဝန်ကြီးဌာနမှဝန်ထမ်းများနှင့်အတူ ပူးပေါင်းဆောင်ရွက်ပေးလျက်ရှိကြောင်း သိရသည်။
ထို့အတူ ကျန်းမာရေးဝန်ကြီးဌာန၏ စစ်ကိုင်းတိုင်း၊ ခရိုင်နှင့် မြို့နယ်ပြည်သူ့ကျန်းမာရေးဦးစီးဌာနမှ စစ်ကိုင်းတိုင်းအတွင်းရှိ ယာယီကယ်ဆယ်ရေးစခန်းများဖြစ်သော ရန်နိုင်အခြေခံပညာအထက်တန်း ကျောင်း၊ စည်းခုံကြီး၊ နှစ် ၇၀၀ ကွင်း၊ စကုမော်စ ခန်းနှင့် မြို့သစ်အိုးအိမ်ကယ်ဆယ်ရေးစခန်းများသို့ လိုအပ်သောဆေးနှင့်ဆေးပစ္စည်းများ၊ LifeStraw ရေသန့်စက်များအား ဖြန့်ဖြူးပေးလျက်ရှိကြောင်း သိရသည်။