မကွေးတိုင်း၊ မကွေးမြို့၊ အောင်ရတနာရပ်ကွက်ရှိ “ချိုချို”ရတနာဆိုင်ပိုင်ရှင်အားသေနတ်ဖြင့်ပစ် ခတ်၍ ရွှေထည်ပစ္စည်းများကိုလုယက်ယူဆောင်သွားသူများအား လုံခြုံရေးအဖွဲ့ဝင်များက ည တွင်းချင်းဖမ်းဆီးရမိခဲ့ကြောင်း နစက ၏သ တင်းထုတ်ပြန်ရေးအဖွဲ့ထံမှ သိရသည်။
ပြီးခဲ့သည့် နိုဝင်ဘာ ၂၈ ရက်နေ့လည် ၁ နာရီကျော်ခန့်က “ချိုချို”ရတနာဆိုင်သို့ အမျိုးသားနှစ်ဦးက ဆိုင်ကယ်တစ်စီးဖြင့်ရောက်ရှိလာကာ ဆိုင်အတွင်းဝင်ရောက်ကာ သေနတ်ဖြင့်ပစ်ခတ်ခြိမ်းခြောက်၍ မှန်ကောင်တာအား တူဖြင့်ထုခွဲပြီး ငွေကျပ်(၇၅၄)သိန်းခန့်တန်ဖိုးရှိ ဆွဲသီးပါရွှေဆွဲကြိုး(၂၀)ကုံး၊ ရွှေကလစ်(၁၅)ခု၊ ရွှေအလေး ချိန်(၁၃)ကျပ်သားခန့်ကို လုယက်ယူဆောင်သွားခဲ့ကြကြောင်း သိရသည်။
ဖြစ်စဥ်တွင် ဆိုင်ပိုင်ရှင်ဖြစ်သူဦးထွန်းထွန်းဦး (၅၉)နှစ်နှင့် ဆိုင်အပြင်လမ်းမပေါ်ရှိ ဦးအောင်မျိုးမြင့်ပိုင်(၂၇)နှစ်တို့တွင် ကျည်ထိမှန်ဒဏ်ရာများရရှိခဲ့သဖြင့် ပြစ်မှုကျူးလွန်သူများအား ဖမ်း ဆီးရမိရေးအတွက် မကွေးမြို့မရဲစခန်းက(ပ) ၁၂၃/၂၀၂၄၊ ရာဇသတ်ကြီးပုဒ်မ ၃၉၄ ဖြင့် အမှုဖွင့်၍ စုံစမ်းစစ်ဆေးမှုများပြုလုပ်ခဲ့ကြကြောင်း သိရသည်။
ထို့ကြောင့် ပြစ်မှုကျူးလွန်သူ(၂)ဦးအနက် အောင်ဇော်ထွန်း(၄၉)နှစ်အား ယင်းနေ့ည ၇ နာရီခွဲတွင် မကွေးမြို့နယ်ရှိ ယင်းဆိပ်စစ်ဆေးရေးဂိတ်၊ အောင်မင်းသူ(ခ)မိုးသန်းအား နိုဝင်ဘာ ၂၉ ရက်ည ၇ နာရီခွဲတွင် ပဲခူးတိုင်း၊ ပြည်မြို့၊ ရွှေဆံ တော်ဘုရားပေါ်ရှိ ကျားပျံဓမ္မာရုံတို့၌ ဖမ်းဆီးရမိခဲ့ကြောင်း သိရသည်။
ထို့ပြင် လုယက်ယူဆောင်သွားခဲ့သည့် ရွှေထည်ပစ္စည်းများနှင့် ပြစ်မှုကျူးလွန်စဥ်ကအသုံးပြုခဲ့သော GLOCK 19 ပစ္စတိုသေနတ်(၁)လက်၊ ကျည်အိမ်(၂)ခု၊ ၎င်းကျည်(၁၁)တောင့်တို့အား ၎င်းတို့ဝှက်ထားသည့်နေရာမှ ပြန်လည်သိမ်းဆည်းရမိခဲ့ကြောင်း သိရသည်။
ထို့ကြောင့် ဖမ်းဆီးရမိသူ(၂)ဦးအား ဥပဒေအရထိရောက်စွာအရေးယူနိုင်ရေးအတွက် သက်ဆိုင် ရာတရားရုံးသို့ တရားစွဲဆိုတင်ပို့နိုင်ရန် လုံခြုံ ရေးအဖွဲ့ဝင်များက ဆက်လက်ဆောင်ရွက်လျက်ရှိကြောင်း သိရသည်။