ရန်ကုန်တိုင်း၊ မရမ်းကုန်းမြို့နယ်၊ အမှတ်(၄)ရပ်ကွက် မင်းဓမ္မလမ်းပေါ်တွင် ယနေ့ ဖေဖော်ဝါရီ ၂၅ ရက် နံနက်ပိုင်းက အိမ်စီးကားနှင့် Hijet ယာဉ်တို့ တိုက်မိကာ Hijet ယာဉ်တိမ်းမှောက်ခဲ့သည့် ဖြစ်စဉ်ဖြစ်ပွားခဲ့ကြောင်း သိရသည်။ယနေ့ နံနက် ၁၁ နာရီ ၄၀ မိနစ်ဝန်းကျင်က မရမ်းကုန်းမြို့နယ်၊အမှတ်(၄)ရပ်ကွက်၊မင်းဓမ္မလမ်းမပေါ် ရှိ တော်ဝင်လမ်း မီးပွိုင့်တွင် ဖြစ်ပွားခဲ့ခြင်းဖြစ်ပြီး Hijet ယာဉ် ပေါ်တွင် လိုက်ပါလာသည့် သံဃာတော်တစ်ပါး အပါအဝင် (၅) ဦး ဒဏ်ရာရရှိခဲ့ကြောင်း သိရသည်။
အဆိုပါ ဖြစ်စဉ်၌ ဒဏ်ရာရရှိခဲ့သည့် သံဃာတော်တစ်ပါး၊ အမျိုးသား (၂) ဦးနှင့်အမျိုးသမီး (၂) ဦးကိုရွှေရောင်သမိုင်းအသင်းမှ မြေပြင်ပြုစုကုသမှုများပြုလုပ်ပေးခဲ့ကြသည်။
“စိုးရိမ်ရဒဏ်ရာရကြတာတော့မဟုတ်ပါဘူး ဖုန်းသတင်းရလို့ ချက်ခြင်းသွားပြီး ကူညီပေးခဲ့တာပါ။ Hijet ကားကတော့ ပျက်စီးတာ အတော်များတယ်။ အိမ်စီးကားကတော့ ကားခေါင်းအောက်ခြေပျက် စီးသွားတယ်”ဟု လူမှုကူညီရေးအသင်းဝင်တစ်ဦးကပြောသည်။
ထိခိုက်ဒဏ်ရာရသူများအား ရွှေရောင်သမိုင်းအသင်း၏ လူနာတင်ကားများဖြင့် မြောက်ဥက္ကလာပဆေးရုံကြီးသို့ ပို့ဆောင်ပေးခဲ့ကြကြောင်း သိရသည်။
Photo-ရွှေရောင်သမိုင်းအသင်း
