မန္တလေးတိုင်း၊ မဟာအောင်မြေမြို့နယ်ရှိ “ရွှေစင် အကယ်ဒမီရွှေဆိုင်”တွင် ယနေ့ ဒီဇင်ဘာ ၁၈ ရက်ညနေ ၅ နာရီခွဲခန့်က သေနတ်ပြခြိမ်းခြောက်၍ ဓားမြတိုက်မှုဖြစ်ပွားခဲ့ကြောင်း လုံခြုံရေးအဖွဲ့နှင့်နီးစပ်သူများထံမှ သိရသည်။
မဟာအောင်မြေမြို့နယ်၊ ဟေမမာလာမြောက်ရပ်ကွက်၊ ၇၇ လမ်း၊ ၃၆ လမ်းနှင့် ၃၇ လမ်းကြားတွင်ဖွင့်လှစ်ထားသော “ရွှေစင်အကယ်ဒမီရွှေဆိုင်”သို့ ဆိုင်ကယ်(၂)စီးဖြင့် နှာခေါင်းစည်းနှင့်ဆိုင်ကယ်ဦးထုတ်များဆောင်းထားသည့် အမည်မသိအမျိုးသား(၂)ဦးရောက်ရှိလာခဲ့ကြောင်း သိရသည်။
ထိုသို့ ရောက်ရှိလာပြီးနောက် ဆိုင်ပိုင်ရှင်ဖြစ်သူနှင့်ဆိုင်ဝန်ထမ်းများအား သေနတ်ပြခြိမ်းခြောက်၍ ဆိုင်ကောင်တာပေါ်ရှိ ရွှေ(၄)ပိဿာခန့်(စီစစ်ဆဲ)ကို ကိုလုယက်ယူဆောင်ကာ ဆိုင်ကယ်များဖြင့်မောင်းနှင်ထွက်ပြေးသွားခဲ့ကြကြောင်း သိရသည်။
ဖြစ်စဥ်အား လုံခြုံရေးအဖွဲ့ဝင်များနှင့်ရဲတပ်ဖွဲ့ဝင်များက အခင်းဖြစ်ရပ်နှင့် CCtV မှတ်တမ်းများကို ကြည့်ရှုစစ်ဆေးပြီး အမှုဖွင့်လှစ်ကာ ပြစ်မှုကျူးလွန်သူများအားဖမ်းဆီးရမိရေးအတွက် ဆက်လက်ဆောင်ရွက်လျက်ရှိကြောင်း သိရသည်။