မြန်မာ-ထိုင်းနယ်စပ် တာချီလိတ်မြို့ရှိ မယ်ဆိုင်- မယ်ဟောက်ချောင်းဘေးရှိ မြန်မာနိုင်ငံဘက်မှ ထိုင်းနိုင်ငံဘက်သို့ကျူးကျော်ဆောက်လုပ်ထားသည့် အဆောက်အအုံများကို ယနေ့ နိုဝင်ဘာ ၂၇ ရက်မှစတင်ကာ ဖယ်ရှားမှုများပြုလုပ်လျက်ရှိကြောင်း သိရသည်။
တာချီလိတ်မြို့ရှိ တာလော့ရပ်ကွက်၊ မယ်ခေါင်ရပ်ကွက်နှင့် ရန်အောင်မြေရပ်ကွက်များတွင် ထိုင်းနိုင်ငံဘက်သို့ ကျူးကျော်ဆောက်လုပ်ထားသည့် အဆောက်အအုံများ၊ အုတ်တံတိုင်းများကို စတင်ဖယ်ရှားခဲ့ကြခြင်းဖြစ်ကြောင်း သိရသည်။
ထိုသို့ ဖယ်ရှားခြင်းမပြုမီ တာဝန်ရှိသူများက ကျူးကျော်ဆောက်လုပ်ထားသည့် အဆောက်အအုံများနှင့် အုတ်တံတိုင်းပိုင်ရှင်များကိုတွေ့ဆုံ၍ အသိပေးအကြောင်းကြားမှုများပြုလုပ်ပြီးနောက် စက်ယန္တရားများဖြင့် ဖယ်ရှားခဲ့ကြကြောင်း သိရသည်။
မယ်ဆိုင်-မယ်ဟောက်ချောင်းတစ်လျှောက်တွင် မြန်မာနိုင်ငံဘက်မှ ထိုင်းနိုင်ငံဘက်သို့ ကျူးကျော်ဆောက်လုပ်ထားသည့် RC (၁)ထပ်၊ (၂) ထပ်အဆောက်အအုံ၊ သစ်သားအိမ်၊ ဂိုဒေါင်ပေါင်း(၈)ခု၊ အဆောက်အအုံနောက်ဘက်ပိုင်း(၅) ခု၊ အုတ်တံတိုင်းနှင့် အုတ်နံရံ(၁၆)ခု၊ အိမ်သာ၊ ရေတင်စင်၊ ဆီသိုလှောင်ကန်ပေါင်း(၄)ခု(စုစုပေါင်း ၃၃ ခု)ရှိကာ ထိုင်းနိုင်ငံဘက်မှ မြန်မာနိုင်ငံဘက်သို့ ကျူးကျော်ဆောက်လုပ်ထားသည့် အဆောက်အအုံ(၄၅)ခုရှိကြောင်း သိရသည်။