မိုင်းဖုန်းဆရာတော်ကြီး၏ ယနေ့ ဇန်နဝါရီ ၅ ရက်တွင်ကျရောက်သည့် သက်တော်(၆၁)နှစ်ပြည့် ဝိဇာတမွေးနေ့မင်္ဂလာအား တာချီလိတ်မြို့နယ်၊ မိုင်းဖုန်း(က)ကျေးရွာအုပ်စု၊ လွန်းလိန်းသာသနာ့နယ်မြေရှိ မိုင်းဖုန်းကျောင်းတိုက်၌ဆင်ယင်ကျင်းပလျက်ရှိသည်။
မိုင်းဖုန်းဆရာတော်ကြီး၏ မွေးနေ့မင်္ဂလာအားဆင်ယင်ကျင်းပရာ မိုင်းဖုန်းဆရာတော်ကြီးသည် နံနက် ၄ နာရီတွင် လွန်းလိန်းစေတီတော်၌ ဘုရားရှစ်ခိုးပူဇော်ပြီးနောက် နှီးဘုရားကျောင်းဆောင်တွင် ဘုရားဆွမ်းတော်ကပ်လှူပူဇော်ခဲ့သည်။
ထို့ပြင် မိုင်းဖုန်းဆရာတော်ကြီးသည် ယနေ့ ဇန်နဝါရီ ၅ ရက်မှစတင်၍ ဝစီပိတ်အဓိဋ္ဌာန်ဝင်တော်မူမည်ဖြစ်၍ နေ့လည် ၃ နာရီ၌ မိုင်းဖုန်းဆရာတော်ကြီးအား တပည့်သာဝကများက ရေသပ္ပာယ်ပူဇော်သွားမည်ဖြစ်သည်။
မိုင်းဖုန်းဆရာတော်ကြီး၏ သက်တော်(၆၁)နှစ်ပြည့် ဝိဇာတမွေးနေ့မင်္ဂလာအား ဇန်နဝါရီ ၁ ရက်မှ ဇန်နဝါရီ ၆ ရက်အထိ ဆင်ယင်ကျင်းပလျက်ရှိကာ အလှူရှင်များမှ စတုဒိသာကျွေးမွေးလှူဒါန်းခြင်းများပြုလုပ်လျက်ရှိပြီး လွန်းလိန်းစေတီဧရိယာ၌ ဈေးရောင်းချခြင်းများကို ခွင့်ပြုထားခြင်းမရှိဘဲ ဈေးရောင်းချလိုသူများအား လွန်းကျိုင်းကျေးရွာအနီးတွင် ကွင်းပြင်တစ်ခုသတ်မှတ်ပေးထားသည်။