အိန္ဒိယဝန်ကြီးချုပ် နာရင်ဒြာမိုဒီနှင့် အမေရိကန်သမ္မတ ဒေါ်နယ်ထရမ့်ပ်တို့ နှစ်ဦး လာမည့်လတွင် ဝါရှင်တန်၌ တွေ့ဆုံဆွေးနွေးနိုင်ရေးအတွက် နှစ်နိုင်ငံတာဝန်ရှိသူများက စီစဉ်လျက်ရှိသည်ဟု ရိုက်တာသတင်းဌာနက ဖော်ပြခဲ့သည်။
ဆွေးနွေးပွဲဖြစ်မြောက်ခဲ့ပါက မဟာဗျူဟာမိတ်ဖက်နှစ်နိုင်ငံအကြား ဆက်ဆံရေး ပိုမိုခိုင်မာလာစေနိုင်ပြီး အထူးသဖြင့် တရုတ်နိုင်ငံအပေါ် တန်ပြန်ရန်၊ ကုန်သွယ်မှုဆက်ဆံရေး မြှင့်တင်ရန်နှင့် ကျွမ်းကျင်လုပ်သားဆိုင်ရာ ဗီဇာလုပ်ငန်းစဉ် လျှော့ချနိုင်ရေးတို့ကို မျှော်လင့်ရသည်။ အဆိုပါ အကြောင်းအရာများသည် ဆွေးနွေးပွဲတွင် ပါဝင်ဖွယ်ရှိသော အဓိက အကြောင်းအရာများဖြစ်သည်ဟု သတင်းအရင်းအမြစ်များက ပြောကြသည်။
ထရမ့်ပ်၏ အိမ်ဖြူတော် တစ်ကျော့ပြန်ခရီးသည် အိန္ဒိယကုန်စည်များအပေါ် အခွန်စည်းကြပ်မှုအသစ်များ ပြဌာန်းလာနိုင်သည့် အလားအလာရှိေနသည့်အတွက် နူးဒေလီကို စိုးရိမ်မှုများမြင့်တက်စေသည်။ အမေရိကန်ထုတ်ကုန်များအပေါ် အိန္ဒိယက မြင့်မားသော အခွန်စည်းကြပ်မှုအတွက် သူ၏ ပထမ သမ္မတသက်တမ်းတွင် ဝေဖန်ခဲ့ပြီး အပြန်အလှန် အကျိုးဖြစ်ရေးညှိနှိုင်းရန် အကြံပြုခဲ့သည်။
သို့သော်လည်း အိန္ဒိယသည် ကုန်သွယ်ရေးဆိုင်ရာ အဖုအထစ်များကို ဖြေလျှော့ရန် ပြင်ဆင်ထားပြီး အမေရိကန်ရင်းနှီးမြှုပ်နှံမှုများကို ဆွဲဆောင်ရန်အတွက် မက်လုံးများပေးရန် လမ်းဖွင့်ထားသည်ဟု သတင်းအရင်းမြစ်အများက ဆိုသည်။
အခွန်စည်းကြပ်မှုနှင့် ပတ်သက်၍ ဝါရှင်တန်ထံမှ တရားဝင် ဆက်သွယ်မှု မရှိသေးသော်လည်း အစောပိုင်းဆွေးနွေးမှုများအရ ထရမ့်ပ်၏ ဒုတိယမြောက်သက်တမ်းအတွက် အပြုသဘောဆောင်သော သဘောထားရှိလာနိုင်သည်ဟု အိန္ဒိယတာဝန်ရှိသူများက ယုံကြည်ထားသည်။
Ref: စီအင်န်ဘီစီ
