မူဆယ်မြို့တွင် ကျင်းပမည့် မီနီမာရသွန်အပြေးပြိုင်ပွဲကို ပြိုင်ပွဲအမျိုးအစား (၃) မျိုးဖြင့် ပြုလုပ်သွားမည်ဖြစ်ကြောင်း သိရသည်။
မူဆယ်မြို့တွင် ၂၀၂၄ခုနှစ်၊ ဒီဇင်ဘာလ ၂၁ ရက်(စနေနေ့) နံနက်(၀၆:၀၀) နာရီတွင် မီနီမာရသွန် အပြေးပြိုင်ပွဲအား ပြိုင်ပွဲအမျိုးအစား(၃)မျိုးဖြင့် ကျင်းပဆောင်ရွက်သွားမည်ဖြစ်သည်။
အပျော်တမ်းပြိုင်ပွဲဝင်များအနေဖြင့် ပြေးလမ်းကြောင်းတွင် မင်္ဂလာမူဆယ်မှ ကမ်းနားလမ်းထောင့်မှ မင်္ဂလာမူဆယ်အိမ်ရာဝင်းကိုပတ်၍ မင်္ဂလာမူဆယ်အထိ (၄)ကီလိုရှိပြီး အဆိုပါပြိုင်ပွဲတွင် အသက် (၅၀)နှစ်အထက်လူကြီးများ၊ အသက်(၁၂)နှစ်အောက် ကလေ-းများနှင့် မိသားစုအလိုက် ဝင်ရောက် ယှဉ်ပြိုင်နိုင်ပြီး၊ မိသားစုအလိုက်ပြိုင်ပွဲဝင်ရာတွင် အုပ်ထိန်းသူအပါအဝင် အသက်(၁၂)နှစ်အောက် သား/သမီး(၁)ဦး (သို့မဟုတ်)(၂)ဦး ပါရှိရမည်ဖြစ်သည်။
ပထမ ရရှိသူအား ဆုငွေ ၃ သိန်းကျပ်၊ ဒုတိယရရှိသူအား ဆုငွေ ၂ သိန်းကျပ်၊ တတိယ ရရှိသူအား ဆုငွေ ၁.၅ သိန်း ကျပ်ဖြင့် အဆင့် ၂ဝ အထိ ရရှိသူများကို နှစ်သိမ့်ဆုများ ချီးမြှင့်သွားမည်ဖြစ်ကြောင်း သိရသည်။
ထို့ပြင် တစ်ဝက်ပြိုင်ပွဲများအနေဖြင့် မင်္ဂလာမူဆယ်မှ ယုံကျန်းဟိုတယ်၊ ယုံကျန်းဟိုတယ်မှ မင်္ဂလာမူဆယ်အထိ (၁၃)ကီလိုရှိပြီး မည်သူမဆို ဝင်ရောက်ယှဉ်ပြိုင်နိုင်ကြောင်း၊ ပထမဆုရရှိသူကို ဆုငွေ ၈ သိန်းကျပ်၊ ဒုတိယဆုရရှိသူကို ဆုငွေ ၇ သိန်း၊ တတိယဆုရရှိသူကို ဆုငွေ ၆ သိန်းဖြင့် အဆင့် ၂၀ အထိ နှစ်သိမ့်ဆုများ ချီးမြှင့်သွားမည့်အပြင် ဆုများကို ကျား/မ ခွဲခြား၍ ဆုများချီးမြှင့်သွားမည် ဖြစ်သည်။
အလားတူ အပြည့်ပြိုင်ပွဲဝင်များအနေဖြင့် မင်္ဂလာမူဆယ်မှ ပြည်ထောင်စုလမ်းမ OHC တိုးဂိတ်၊ ပြည်ထောင်စုလမ်းမOHC တိုးဂိတ်မှ မင်္ဂလာမူဆယ်အထိ(၁၈)ကီလိုမီတာရှိပြီးမည်သူမဆို ဝင်ရောက် ယှဉ်ပြိုင်နိုင်ကာ (၁၈) ကီလိုမီတာ(အပြည့်) ပြိုင်ပွဲတွင် ပထမဆုငွေကျပ်(၁ဝ)သိန်း၊ ဒုတိယဆု ငွေကျပ်(၈)သိန်း၊ တတိယဆုငွေကျပ်(၆)သိန်းဖြင့် အဆင့်(၂၀)အထိ နှစ်သိမ့်ဆုများ ချီးမြှင့်သွားမည် ဖြစ်ပြီးဆုများကို ကျား/မ ဆုချီးမြှင့် သွားမည်ဖြစ်ကြောင်း သိရသည်။
ပြိုင်ပွဲဝင်ရန် စာရင်းပေးသွင်းထားမှုမှာ စုစုပေါင်း(၂၈၃၀)ဦးရှိပြီး အပျော်တမ်းပြိုင်ပွဲ(၄) ကီလိုတွင် (၁၀၀၀)ဦး၊ တစ်ဝက်ပြိုင်ပွဲ (၁၃)ကီလိုတွင် (၁၂၀၀)ဦးနှင့် အပြည့် ပြိုင်ပွဲ(၁၈)ကီလိုတွင် (၆၃၀)ဦးရှိကြောင်း သိရသည်။
ပြိုင်ပွဲ စတင်ကျင်းပမည့် MINI မာရသွန်ပြိုင်ပွဲ တာလွှတ်မည့်နေရာမှာ မင်္ဂလာမူဆယ်ဝင်ပေါက် အဝမှ ဖြစ်ပြီးပြိုင်ပွဲကျင်းပနေစဉ်း နံနက် ၅ နာရီမှစ၍ မင်္ဂလာမူဆယ် လမ်းမကြီး တစ်လျှောက်ကို ယုံကျန်းဟိုတယ်လမ်းဆုံအထိ ပြိုင်ပွဲဝင် အားကစားသမားများ ဘေးအန္တရာယ်ကင်းစေရန်အတွက် ခေတ္တ လမ်းပိတ်ထားမည်ဖြစ်ကြောင်း သိရသည်။