လေဆိပ်အနီးရှိ လျှပ်စစ်ဓါတ်အားခွဲရုံတွင် မတ်လ ၂၁ ရက်နေ့က အကြီးအကျယ်မီးလောင်သောကြောင့် ဗြိတိန်နိုင်ငံ၏ ဟီသရိုးလေဆိပ်ကို ပိတ်လိုက်ရပြီး ကမ္ဘာတစ်ဝန်းမှ လေယာဉ်ခရီးစဉ်များ ကမောက်ကမ ဖြစ်ကုန်သည်။
မီးလောင်ကျွမ်းမှုကြောင့် ဥရောပ၏ လေယာဉ်အဝင်အထွက်အများဆုံးနှင့် ကမ္ဘာ့ပဉ္စမမြောက် လေယာဉ်အဝင်အထွက်အများဆုံး ဟီသရိုးလေဆိပ်တွင် ကြီးမားသော ဓါတ်အားပြတ်တောက်မှုဖြစ်ခဲ့ကာ ယင်း၏ အရန်ဓါတ်အားပေးစနစ်သည်လည်း ပြတ်တောက်သွားခဲ့ကြောင်း၊ လန်ဒန်အနောက်ပိုင်းရှိ မီးလောင်ရာ နေရာ ကို မီးသတ်သမား ၇၀ ဝန်းကျင်ဖြင့် ငြိမ်းသတ်လျက်ရှိကြောင်း လန်ဒန် မီးသတ်တပ်ဖွဲ့က ပြောကြားခဲ့သည်။
ကြီးမားသော လိမ္မော်ရောင် မီးတောက်မီးလျှံများနှင့် မီးခိုးလုံးများ ကောင်းကင်သို့ ထိုးတက်နေခဲ့သည်ကို မြင်တွေ့နိုင်ပြီး အခင်းဖြစ်နေရာအနီးရှိ လူဦးရေ ၁၅၀ ဝန်းကျင်ကို ဘေးလွတ်ရာ ရွှေ့ပြောင်းပေးခဲ့ရကာ ထောင်နှင့်ချီသော နေအိမ်အဆောက်အအုံများ ၌ လျှပ်စစ်မီး ပြတ်တောက်ခဲ့သည်။
မီးလောင်ရသည့် အကြောင်းရင်းကို မသိရသေးဟု မီးသတ်တပ်ဖွဲ့က ပြောသည်။
ဓါတ်အားပြတ်တောက်မှုကြောင့် လေဆိပ်ကို ညသန်းခေါင် အထိ ပိတ်ထားမည်ဖြစ်ကြောင်း၊ နေ့စဉ် လေယာဉ်ခရီးစဉ်ပေါင်း ၁,၃၅၁ ခုကို စီမံကိုင်တွယ်ကာ ခရီးသည်ပေါင်း ၂၉၁,၀၀၀ ဦး အဝင်အထွက်ရှိသည့် ဟီသရိုးလေဆိပ်က ပြောကြားခဲ့သည်။
“ခရီးသည်တွေ လေဆိပ်ကို မလာရောက်ကြဖို့ အကြံပြုထားပါတယ်၊ ထပ်ထုတ်ပြန်တဲ့ သတင်းအချက်အလက်တွေအတွက် သက်ဆိုင်ရာ လေကြောင်းလိုင်းတွေကို ဆက်သွယ်သင့်ပါတယ်” ဟု လေဆိပ်က ပြောဆိုခဲ့ပြီး အဆင်မပြေမှုအတွက် တောင်ပန်အပ်ပါကြောင်းပြော ကြားခဲ့သည်။
မတ် ၂၀ ရက် ည ၁၁ နာရီအချိန်က မီးလောင်ခဲ့ခြင်းဖြစ်ကာ ဟီးသရိုးလေဆိပ်သို့ ပျံသန်းနေသည့် လေယာဉ်များသည် ဗြိတိန်နှင့် ဥရောပတစ်ဝန်းရှိ တခြား လေဆိပ်များသို့ လမ်းကြောင်းပြောင်းခဲ့ရသကဲ့သို့ ခရီးဝေး လေကြောင်းခရီးစဉ်များသည် လည်း၎င်းတို့ ထွက်ခွာခဲ့ရာ လေဆိပ်များသို့ လမ်းကြောင်းပြန်လှည့်ခဲ့ရသည်။
Ref: သည်စထရိတ်တိုင်းမ်စ်