မန္တလေးတိုင်းဒေသကြီး၊ မြင်းခြံမြို့၊ လေးအိမ်တန်း ကျေးရွာတွင် မတ်လ (၃၀) ရက်၊ ည (၁၀)နာရီ (၄၄)မိနစ် အချိန်ခန့်က မီးလောင်မှု ဖြစ်ပွားရာ မိနစ် (၄၀)ခန့်အကြာ ငြှိမ်းသတ်ခဲ့ရကြောင်း မြင်းခြံခရိုင်မီးသတ်စခန်းမှ သိရသည်။
အဆိုပါ လေးအိမ်တန်း ကျေးရွာတွင် နေအိမ်မီးလောင်မှု ဖြစ်ပွားကြောင်း သတင်းအရ မြင်းခြံခရိုင်မီးသတ်စခန်းမှ မီးငြှိမ်းသတ်ယာဉ်(၄)စီး၊ မီးသတ်ရေသယ်ယာဉ်(၃)စီး၊ မြင်းခြံမြို့နယ်မီးသတ်စခန်းမှ မီးငြှိမ်းသတ်ယာဉ်(၃)စီး၊ မီးသတ်ရေသယ်ယာဉ် (၁)စီး၊ မြင်းခြံနယ်မြေမီးသတ်စခန်းမှ မီးသတ်ရေသယ်ယာဉ်(၁)စီး၊ စက်မှုဇုန်အရန်မီးသတ်စခန်းမှ မီးငြှိမ်းသတ်ယာဉ်(၁)စီးတို့ ထွက်ခွာငြှိမ်းသတ်ခဲ့ကြကြောင်း သိရသည်။
ထို့အတူ Ok စက်သုံးဆီဆိုင်အသင်းမှ ရေသယ်ယာဉ်(၁)စီး၊ နတ်ကြီးပင်ပရဟိတအသင်းမှ ရေသယ်ယာဉ်(၁) စီး၊ အဖြူရောင်ပရဟိတအသင်းမှ ရေသယ်ယာဉ်(၁)စီး၊ သန္ဓေမီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များနှင့်အတူ ထွက်ခွာငြှိမ်းသတ်ခဲ့ရကြောင်း သိရသည်။
ထိုသို့ ထွက်ခွာ ငြှိမ်းသတ်ခဲ့ရာ ည (၁၁)နာရီ (၂၅)မိနစ်အချိန်တွင် မီးငြှိမ်းသတ်နိုင်ခဲ့ကြောင်းနှင့် ထိခိုက်ပျက်စီးဆုံးရှုံးမှုတန်ဖိုး၊ မီးလောင်မှုအကြောင်းအရင်း အသေးစိတ်ကို မီးသတ်တပ်ဖွဲ့မှ ဆက်လက်စစ်ဆေးလျက်ရှိကြောင်း သိရသည်။