မန္တလေးတိုင်း၊ မြစ်သားမြို့နယ်တွင် ယနေ့ အောက်တိုဘာ ၂ ရက်က ပန်းလောင်မြစ်ရေမြင့်တက်ကာ ကျေးရွာများအတွင်းသို့ ရေဝင်ရောက်မှုများဖြစ်ပေါ်လျက်ရှိကြောင်း မီးသတ်တပ်ဖွဲ့နှင့်ဒေသခံများထံမှ သိရသည်။
ထိုသို့ ရေဝင်ရောက်မှုများဖြစ်ပေါ်လျက်ရှိရာ၌ ရွှေပေါ်ကျွန်းကျေးရွာတွင် ပိုမိုဝင်ရောက်နေသဖြင့် ကျေးရွာအတွင်းနေထိုင်သူများအား မြစ်သားမြို့နယ်မီးသတ်စခန်းမှတပ်ဖွဲ့ဝင်များ၊ လူမှုကူညီရေးအသင်းဝင်များက ရေဘေးလွတ်ရာသို့ရွှေ့ ပြောင်းပေးလျက်ရှိကြောင်း သိရသည်။
ပန်းလောင်မြစ်ရေမြင့်တက်လာခြင်းသည် မြို့နယ်အတွင်းရှိ ကင်းတားရေလှောင်တမံ၏ လက်ခံနိုင်သည့် ရေပမာဏထက်ကျော်လွန်နေခြင်းကြောင့် ရေထိန်းတံခါး(၄)ပေါက်ကိုဖွင့်လှစ်ခဲ့ရခြင်းကြောင့်ဖြစ်သည်ဟု ဒေသခံများ၏ပြောကြားချက်အရ သိရသည်။
ထိုသို့ ရေထိန်းတံခါးများအား ဖွင့်လှစ်ခဲ့ရသဖြင့် ပန်းလောင်မြစ်အနီးနေထိုင်သူများအနေဖြင့် အမြင့်ပိုင်းနေရာများ၌ ယာယီရွှေ့ပြောင်းနေထိုင်ကြရန် မီးသတ်တပ်ဖွဲ့ဝင်များမှ ကြိုတင်အသိပေးမှုများပြုလုပ်ခဲ့ကြောင်း သိရသည်။
ယနေ့ အောက်တိုဘာ ၂ ရက်နံနက် ၉ နာရီခွဲအထိ ပန်းလောင်မြစ်ဘေးရှိ ရွာခိုင်ကြီး၊ အိမ်ရှ့တောင်၊ ရွှေပေါ်ကျွန်းကျေးရွာတို့၏ အနိမ့်ပိုင်းရပ်ကွက်များတွင် (၂)ပေခန့်၊ ဥသျှစ်ကုန်း၊ ကျန်တော၊ မြို့မ(အရှေ့)၊ မြို့မ(အနောက်)၊ မင်းကုန်း၊ ရွှေသူဌေး၊ ဘူတာရပ်ကွက်၊ ကျွန်းလှ၊ ယွေး၊ လက်ပံဆိပ်ကျေးရွာများတွင်လည်း (၃)ပေခန့်အထိ ရေများဝင်ရောက်လျက်ရှိကြောင်း သိရသည်။
