မြန်မာငလျင်သည်ထိပ်တန်းအဆင့် အရေးပေါ်အခြေအနေဖြစ်၊ အရေးပေါ် ရန်ပုံငွေရှာ‌ဖွေ-ကမ္ဘာ့ကျန်းမာရေးအဖွဲ့

မြန်မာငလျင်ဘေးသည် ထိပ်တန်းအဆင့် အရေးပေါ်အခြေအနေတစ်ခုဖြစ်ကြောင်း ကမ္ဘာ့ကျန်းမာရေးအဖွဲ့က မတ်လ ၃၀ ရက် နေ့တွင် ပြောကြားလိုက်ပြီး အသက်ကယ်ဆယ်ရန်နှင့် လာမည့် ရက် ၃၀ အတွင်း ကူးစက်ရောဂါဖြစ်ပွားမှုများကို တားဆီးကာကွယ်ရန်အတွက် အရေးပေါ် ရန်ပုံငွေ အမေရိကန်ဒေါ်လာ ၈ သန်းကို ရံပုံ‌ေငွရှာဖွေရန် လိုအပ်ကြောင်း ပြောကြားခဲ့သည်။

မြန်မာနိုင်ငံတွင် ခွဲစိတ်ကုသနိုင်မှု နည်းပါးခြင်းကြောင့် သေဆုံးသူအရေအတွက် မြင့်မားနေပြီး ထိခိုက်ဒဏ်ရာရရှိသူများသည် ရောဂါကူးစက်မှုများဖြစ်နိုင်ခြေမြင့်မားကြောင်းနှင့်  နိုင်ငံ၏ နောက်ခံအခြေအနေများကြောင့် ငလျင်ဘေးသည် ကူးစက်ရောဂါဖြစ်ပွားနိုင်ခြေမြင့်မားကြောင်း WHO က ပြောကြားခဲ့သည်။

“WHO သည် ယခုအကြပ်အတည်းကို ၎င်း၏ အရေးပေါ်တုန့်ပြန်ရေးမူဘောင်တွင် အမြင့်ဆုံးဖြစ်သည့် အဆင့် ၃ အရေးပေါ်အခြေအနေအဖြစ် သတ်မှတ်သည်” ဟု ကုလသမဂ္ဂ ကျန်းမာရေးအေဂျင်စီက ရန်ပုံငွေဆိုင်ရာ ပန်ကြားချက်တွင် ပြောဆိုခဲ့သည်။

မြန်မာတွင် ပဏာမ အကဲဖြတ်ချက်များအရ အသေအပျောက်နှင့် ထိခိုက်ဒဏ်ရာရရှိမှု အရေအတွက်သည် မြင့်မားနေပြီး အရေးပေါ်ကုသစောင့်ရှောက်မှုများကို အရေးတကြီး လိုအပ်နေကြာင်း၊ လျှပ်စစ်နှင့် ရေပေးဝေမှု ပြတ်တောက်နေကာ ကျန်းမာရေးစောင့်ရှောက်မှုများ ရရှိမှု အခြေအနေဆိုးလာပြီး ရေနှင့် အစားအစာကြောင့်ဖြစ်သော ရောဂါဘယများဖြစ်ပွားနိုင်ခြေ သည် ပိုများလာကြောင်း WHO က ပြောသည်။

လာမည့်ရက် ၃၀ အတွင်း အရေးတကြီး ကျန်းမာရေးလိုအပ်ချက်များကို ဖြည့်ဆည်းဆောင်ရွက်ရန် အမေရိကန်ဒေါ်လာ ၈ သန်း လိုအပ်ပြီး အသက်များကို ကယ်တင်ရန်၊ ရောဂါဘယများကို တားဆီးရန်၊ မရှိမဖြစ်သော ကျန်းမာရေးဝန်ဆောင်မှုများ ပြန်လည်ထူထောင်ရန်အတွက် လိုအပ်သော ရံပုံငွေဖြစ်သည်ဟု ဆိုသည်။

ရန်ပုံငွေ ချက်ချင်းမရရှိပါက အသက်များ ဆုံးရှုံးကာ ထိခိုက်လွယ်သော ကျန်းမာရေးစနစ်သည် ယိုယွင်းလာမည်ဟု WHO က ပြောကြားခဲ့သည်။

Ref: သည်စထရိတ်တိုင်းမ်စ်