မြန်မာနိုင်ငံမှသင်တန်းသားများ စေလွှတ်ပါကကြိုဆိုသွားမည့် (FEFU) တက္ကသိုလ်
ရုရှားအရှေ့ဖျား၏ လူမှုစီးပွားနှင့် ယဉ်ကျေးမှု ဖွံ့ဖြိုးတိုးတက်ရေးတွင် အဓိကကျသည့် FEFU သည် ထိပ်တန်းသုတေသန၊ ပညာရေးနှင့် ဆန်းသစ်တီထွင်မှုစင်တာများပါဝင်ပြီး ပညာရေးဆိုင်ရာ ပရိုဂရမ်ပေါင်း ၁၅၀ ကျော်ကို ရွေးချယ်တက်ရောက်နိုင်သည့်တက္ကသိုလ်ဖြစ်သည်။ကျောင်းသား သုံးသောင်းကျော်ရှိရာတွင် ရုရှ၊အမေရိကန်၊ဥရောပ၊အာရှ၊အာဖရိက တို့မှ လာ၍တက်ရောက်နေသော ကျောင်းသားများဖြစ်သည်။
နစက ဥက္ကဋ္ဌ၊နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်နှင့်အဖွဲ့သည် စက်တင်ဘာ ၅ ရက် (ယနေ့)မွန်းလွဲပိုင်းက ရုရှားနိုင်ငံ၊ဗလာဒီဗော့စတော့ခ်မြို့ Far Eastern Federal University (FEFU)အတွင်းရှိ Medical School နှင့် Medical Center တို့အား သွားရောက်လေ့လာကြည့်ရှုခဲ့သည်။
နစက ဥက္ကဋ္ဌနှင့်အဖွဲ့အား Vice President of Medical Affairs of FEFU ဖြစ်သူ Dr. Oleg I.Pak နှင့်အဖွဲ့ဝင်များက ကြိုဆိုခဲ့ကြပြီး ကျောင်းခန်းမ၌ ဒေသတွင်းနှင့်နိုင်ငံတကာမှ သင်တန်းသားများအား ဘွဲ့ကြိုနှင့်ဘွဲ့လွန်ဆေးဘက်ဆိုင်ရာပညာရပ်များကို သင်ကြားလေ့ကျင့်ပေးနေမှု၊ဆေးပညာရပ်အ ပြင် ဆေးဘက်ဆိုင်ရာအထောက်အကူပြုသင် တန်းများအား စာတွေ့၊လက်တွေ့ သင်ကြားပေးလျက်ရှိမှုတို့အား ရှင်းလင်းပြသခဲ့ကြသည်။
ထို့ပြင် တိရိစ္ဆာန်များအသုံးပြု၍ သုတေသနပြုလေ့ကျင့်ခန်းများသင်ကြားပေးလျက်ရှိမှု၊Robotic & Mechanistic နည်းပညာရပ်များအသုံးပြု၍ ခွဲစိတ်ကုသမှုလေ့ကျင့်ခန်းများဆောင်ရွက်ပေးနိုင်မှု၊သင်တန်းကျောင်းနှင့်အတူ တွဲဖက်ဖွင့်လှစ်ထားသည့် ခုတင် ၂၅၀ ဆန့်ဆေး ကုသမှုစင်တာတွင် ဆောင်ရွက်ပေးလျက်ရှိသည့် ကျန်းမာရေးစောင့်ရှောက်မှုတို့ရှိကြောင်းလည်းသိရသည်။
နိုင်ငံအတွက်ထူးချွန်ထက်မြက်သည့် လူ သားအရင်းအမြစ်များ မွေးထုတ်ပေးနိုင်ရန် ရည် ရွယ်ချက်ဖြင့် သင်ကြားလေ့ကျင့်ပေးလျက်ရှိပြီး ကျောင်းမှထွက်ပေါ်လာသည့် ထူးချွန်ကျောင်း သား၊ကျောင်းသူများအားစိစစ်၍ နည်းပြများအဖြစ် ပြန်လည်ခန့်အပ်တာဝန်ပေးလျက်ရှိကာ နိုင်ငံပေါင်း ၄၆ နိုင်ငံမှ သင်တန်းသားများအား လက်ခံသင်ကြားပေးလျက်ရှိပြီး မြန်မာနိုင်ငံမှ သင်တန်းသားများစေလွှတ်မည်ဆိုပါက ကြိုဆိုသွားမည်ဟု ရှင်းလင်းတင်ပြခဲ့ကြသည်။
နစက ဥက္ကဋ္ဌကသင်တန်းသားများ စေ လွှတ်သင်ကြားနိုင်ရေးနှင့်ပတ်သက်၍ သင်တန်းသားရွေးခြယ်မှုပုံစံများ၊အဆင့်မြင့်ဆေးပညာရပ်များ တက်ရောက်သင်ကြားနိုင်မည့် အခြေအနေများ၊သင်တန်းသားများလာ၍ တက်ရောက်မည်ဆိုပါက ရရှိနိုင်မည့်အခွင့်အလမ်းများအားမေးမြန်းဆွေးနွေးခဲ့သည်။
ထို့အတူ ကျန်းမာရေးဝန်ကြီးဌာန ပြည်ထောင်စု ဝန်ကြီးဒေါက်တာသက်ခိုင်ဝင်း မှလည်းသင် တန်းသားများစေလွှတ်နိုင်မည့် အခြေအနေများ၊ဆေးတက္ကသိုလ်အချင်းချင်း၊ဆေးရုံအချင်းချင်း ဆေးပညာရပ်ဆိုင်ရာ ပူးပေါင်းဆောင်ရွက်နိုင်မည့် အခြေအနေများအားဆွေးနွေး ခဲ့သည်။
ထို့နောက် နစက ဥက္ကဋ္ဌနှင့်အဖွဲ့အား Medical School အတွင်းရှိ ရောဂါအသီးသီးအလိုက်ဖြစ်ပွားမှု အခြေအနေများအား Symbol ပြသနိုင်သည့် Simulation လူနာဖြင့်လက်တွေ့သင်ခန်းစာဆောင် ရွက်နိုင်မှု၊ ECG၊ Ultra sound နည်းပညာ၊ Micro Surgical Simulator တို့ဖြင့် အသေးစိတ်ခွဲစိတ်ကုသလေ့ကျင့်ဆောင်ရွက်နိုင်မှု၊အသားစများကို နမူနာယူ၍ သုတေသနပြုမှုများ ဆောင်ရွက်လျက်ရှိသည့် Bio technology ဌာနတို့၏ ဆောင်ရွက်နေမှုတို့အားလိုက်လံပြသခဲ့သည်။
Medical Center သို့လည်းသွားရောက်ကြည့်ရူခဲ့ကြသည်။
FEFU Campus အတွင်းရှိ Medical Center သည် အကျယ်အဝန်း ၅၃၀၀၀ စတုရန်းမီတာကျယ်ဝန်းပြီး ရုရှားနိုင်ငံအနှံ့အပြားနှင့်နိုင်ငံရပ်ခြားမှ လာရောက်တာဝန်ထမ်းဆောင်သည့် ပါရဂူ၊ဆရာဝန်နှင့်ဆေးဘက်ဆိုင်ရာ အထောက်အကူပြု ဝန်ထမ်း ၂၀၀ ဦးခန့်ရှိကာ FEFU Medical Center တွင် ဆေးဘက်ဆိုင်ရာဌာနကြီး ၁၄ ခုထားရှိပြီး ရောဂါအမျိုးမျိုးအား ကုသပေးလျက်ရှိကြောင်း သိရသည်။
