မြန်မာနိုင်ငံ၌ ကူညီမှုများပြုလုပ်နိုင်ရန် မလေးရှားနိုင်ငံခြားရေးဝန်ကြီး မြန်မာနိုင်ငံလာရောက်မည်

အလွန်ပြင်းထန်သည့်ငလျင်ဒဏ်ကြောင့် ပျက်စီးဆုံးရှုံးမှုများပြားခဲ့သည့် မြန်မာနိုင်ငံအတွက် အကူအညီများပေးအပ်နိုင်ရေး မြေပြင်အခြေအနေများကိုကြည့်ရှုရန် မလေးရှားနိုင်ငံခြားရေးဝန်ကြီးကို မြန်မာနိုင်ငံသို့စေလွှတ်သွားမည်ဟု အာဆီယံအလှည့်အကျ ဥက္ကဋ္ဌ၊ မလေးရှားနိုင်ငံဝန်ကြီးချုပ် Dato’ Seri Haji Anwar bin Ibrahim ကပြောသည်။

၎င်းမှ ငလျင်ဒဏ်ကြုံတွေ့ခဲ့ရမှုကြောင့် ပျက်စီးဆုံးရှုံးခဲ့ရသည့်အခြေအနေများနှင့်ပတ်သက်၍ နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်နှင့် ယနေ့ မတ် ၃၀ ရက်နေ့လည်ပိုင်းက ဖုန်းဖြင့်ဆက်သွယ်ပြောကြားချိန် ထည့်သွင်းပြောကြားခဲ့ခြင်းဖြစ်သည်။

မလေးရှားနိုင်ငံအနေဖြင့်လည်းကောင်း၊ အာဆီယံအလှည့်ကျဥက္ကဋ္ဌနိုင်ငံအနေဖြင့်လည်းကောင်း မြန်မာနိုင်ငံတွင်ထိခိုက်ပျက်ဆီးဆုံးရှုံးမှုများအပေါ် မိမိတို့အနေဖြင့်ဝမ်းနည်းကြေကွဲရကာ ယနေ့နံနက်ပိုင်းတွင်လည်း မလေးရှားနိုင်ငံမှ ကူညီကယ်ဆယ်ရေးအဖွဲ့ကို လေယာဉ်ဖြင့်စေလွှတ်ခဲ့ပြီး မလေးရှားနိုင်ငံ နိုင်ငံခြားရေးဝန်ကြီးမှလည်း အခြား အာဆီယံအဖွဲ့ဝင်နိုင်ငံများမှ နိုင်ငံခြားရေးဝန်ကြီးများနှင့် ရုပ်သံအစည်းအဝေးပြုလုပ်၍ အာဆီယံအဖွဲ့ဝင်မိသားစုများကြား ချစ်ကြည်ရင်းနှီးမှုနှင့်ပူးပေါင်းဆောင်ရွက်မှုများ မည်သို့ကူညီဆောင်ရွက်ရမည်ကို ဆွေးနွေးခဲ့သည်ဟု ပြောသည်။

ထို့ပြင် မြန်မာနိုင်ငံသည် မလေးရှားနိုင်ငံနှင့်ချစ်ကြည်ရင်နှီးမှုများရှိပြီးဖြစ်သည့်နိုင်ငံဖြစ်၍ မိမိတို့အနေဖြင့် ကူညီမှုများကိုအကောင်းဆုံးဖြစ်အောင် ဆောင်ရွက်ပေးသွားမည်ဖြစ်ပြီး မလေးရှားနိုင်ငံခြားရေးဝန်ကြီးကို မြန်မာနိုင်ငံအတွက်ပေးအပ်နိုင်မည့် အကူအညီများပေးအပ်နိုင်ရေး မြေပြင်အခြေအနေများကိုကြည်ရှုရန် မြန်မာနိုင်ငံသို့ စေလွှတ်သွားမည်ဟု ပြောကြားခဲ့သည်။

ထို့အတူ နစက ဥက္ကဋ္ဌမှလည်း မလေးရှားနိုင်ငံ၏ အကူအညီပေးမှုများကိုကျေးဇူးတင်ကာ AHA စင်တာ၏ အကူအညီပေးမှုဖြင့် ယမန်နေ့ကလည်း စက်ကာပူနိုင်ငံမှ ကယ်ဆယ်ရေးအဖွဲ့များရောက်ရှိတာ ဝန်ထမ်းဆောင်နေပြီး မိမိတို့အနေဖြင့်လည်း ရှာဖွေကယ်ဆယ်ရေးလုပ်ငန်းများကို ဆက်လက်ဆောင် ရွက်လျက်ရှိကာ လက်ရှိအချိန်အထိ ‌ေ-သဆုံးသူ(၁၇၀၀)ဦးခန့်နှင့် ဒဏ်ရာရရှိသူ(၃၄၀၀)ဦးခန့်၊ ပျောက်ဆုံးသူ(၃၀၀)ဦးနီးပါးခန့်ရှိပြီး ‌ေ-သဆုံးသူအရေအတွက်ထပ်မံတိုးလာနိုင်သည်ဟု ပြောကြားခဲ့သည်။

” အခြေအနေပေါ်မူတည်ပြီး အပြောင်းအလဲတွေရှိနိုင်ပါတယ်။ အဓိကအားဖြင့် အခုလိုအခက်အခဲဖြစ်ပေါ်နေချိန်မှာ မလေးရှားနိုင်ငံအပါအဝင် အာဆီယံနိုင်ငံတွေက ဝိုင်းဝန်းကူညီဆောင်ရွက်ပေးမှုအတွက်ကျေးဇူးတင်သလို အာဆီယံအသိုင်းအဝိုင်းကိုလည်း ကျေးဇူးတင်ပါတယ်။ မလေးရှားနိုင်ငံရဲ့ နိုင်ငံခြားရေးဝန်ကြီး မြန်မာနိုင်ငံကိုလာရောက်မှုအတွက်လည်း ကြိုဆိုပါတယ်”ဟု နစက ဥက္ကဋ္ဌက ပြောသည်။

ထို့အတူ မိမိတို့အနေဖြင့် အာဆီယံအသိုင်းအဝိုင်း အတွင်း မှန်ကန်သည့်စိတ်သဘောထားဖြင့် ပူးပေါင်းဆောင်ရွက်လျက်ရှိကာ ယခုကဲ့သို့ မလေးရှားနိုင်ငံအနေဖြင့်၊ အာဆီယံအလှည့်ကျဥက္ကဋ္ဌအနေဖြင့် ယခုကဲ့သို့ဆက်သွယ်မေးမြန်းကူညီဆောင်ရွက်ပေးမှုသည် မြန်မာနိုင်ငံအတွက်ခွန်အားများစွာရရှိစေပြီး မိမိနှင့် မြန်မာနိုင်ငံ ပြည်သူများအနေဖြင့် များစွာကျေးဇူးတင်သည်ဟုလည်း နစက ဥက္ကဋ္ဌက ပြောကြားခဲ့သည်။