မြန်မာသင်္ဘောသား၄ဦး တရုတ်နိုင်ငံ၌ ဖမ်းဆီးထိန်းသိမ်းခြင်းခံနေရသည့်ကိစ္စ သက်ညှာစွာစဉ်းစားပေးဖို့ မြန်မာသံရုံးက တရုတ်တာဝန်ရှိသူများထံဆွေးနွေး
တရုတ်ပြည်သူ့သမ္မတနိုင်ငံ၊ Shandong Maritime Police Bureau မှ မြန်မာသင်္ဘောသား (၄) ဦးတို့အား တရုတ်နိုင်ငံမှ တင်သွင်း/ တင်ပို့ရန် ပိတ်ပင်တားမြစ်ထားသော ကုန်ပစ္စည်းများ မှောင်ခိုရောင်းဝယ်ရေးပြစ်မှု ကျူးလွန်ခြင်းမသင်္ကာမှုဖြင့် ယာယီစောင့်ကြည့်ထိန်းသိမ်းထားသည့်ကိစ္စနှင့် ပတ်သက်၍ တရုတ်နိုင်ငံ ပေကျင်းမြို့ရှိ မြန်မာသံရုံးက လိုက်ပါကူညီဆောင်ရွက်ပေးနေသည်ဟု သံရုံးဘက်က ထုတ်ပြန်သည်။
တရုတ်နိုင်ငံဘက်က မြန်မာသံရုံးသို့ စာပေးပို့ထားကြောင်းသိရပြီး အဆိုပါစာတွင် Sierra Leone နိုင်ငံပိုင် “WENPU” (အမည်လွှဲ) သင်္ဘောပေါ်တွင် လိုက်ပါ လာသည့် မြန်မာသင်္ဘောသား (၄) ဦးတို့သည် ၂၀၂၂ ခုနှစ်၊ ဖေဖော်ဝါရီလမှစတင်၍ “WENPU” သင်္ဘောဖြင့် တရားဝင်တင်သွင်း/ တင်ပို့ခွင့်မရှိသော အေးခဲအသားများကို ကိုရီးယားသမ္မတနိုင်ငံမှ တရုတ်ပြည်သူ့သမ္မတနိုင်ငံသို့ (၂) ကြိမ်တိုင်တိုင် သယ်ယူပို့ဆောင်ခဲ့ကြပါကြောင်း၊ အဆိုပါမြန်မာ သင်္ဘောသားတို့၏ လုပ်ဆောင်ချက်များသည် “တရုတ်ပြည်သူ့သမ္မတနိုင်ငံ ရာဇဝတ်မှုတရားဥပဒေ” အမှတ် (၁၅၁) ၏ သတ်မှတ်ချက်အရ တရုတ်နိုင်ငံမှ တင်သွင်း/ တင်ပို့ရန် ပိတ်ပင်တားမြစ်ထားသော ကုန်ပစ္စည်းများ မှောင်ခိုရောင်းဝယ်ရေး ပြစ်မှုကျူးလွန်သည်ဟု သံသယဖြစ်ဖွယ်တွေ့ရှိရပါကြောင်း၊ သို့ဖြစ်ပါ၍ “တရုတ်ပြည်သူ့သမ္မတနိုင်ငံ ရာဇဝတ်မှုတရားစွဲဆိုရေးတရားဥပဒေ” အမှတ် (၇၄) ၏ သတ်မှတ်ချက်အရ ၎င်းတို့ (၄) ဦးအား Shandong ပြည်နယ်၊ Weihai မြို့တွင် ယာယီစောင့်ကြည့် ထိန်းသိမ်းထားပါကြောင်း ဖော်ပြပါရှိသည်ဟုသိရသည်။
မြန်မာသံရုံး၊ ပေကျင်းမြို့ အနေဖြင့် ၎င်းတို့ (၄) ဦး၏အမှုကိစ္စနှင့်ပတ်သက်၍ အမှုအမြန် ပြီးပြတ်စေရေး၊ အမှုကို သက်ညှာစွာစဉ်းစားပေးနိုင်ရေး၊ မြန်မာသံရုံး/ မိသားစုဝင်များထံ စာရေးသား ပေးပို့နိုင်ရေးနှင့် မြန်မာသံရုံး/ မိသားစုဝင်များထံမှ စာရေးသားပေးပို့နိုင်ရေး ကောင်စစ်ဆိုင်ရာ တွေ့ဆုံခွင့်ရရှိရေး၊ ဖမ်းဆီးထိန်းသိမ်းခံရစဉ်ကာလအတွင်း ကောင်းမွန်စွာစားသောက်နေထိုင်နိုင်ရေးနှင့် အခြားလိုအပ်သည်များကို ပံ့ပိုးကူညီဆောင်ရွက်ပေးရေးတို့အတွက် သက်ဆိုင်ရာနှင့် ညှိနှိုင်း ဆောင်ရွက်လျက်ရှိနေသည်ဟုသိရသည်။
တရားမဝင်မှောင်ခိုပစ္စည်းများ တင်ဆောင်သည့် သင်္ဘောများမှ မြန်မာသင်္ဘောသားများ ဖမ်းဆီး ထိန်းသိမ်းခံထားရသည့်ဖြစ်စဉ်များ ထပ်မံဖြစ်ပွားလျက်ရှိခြင်းကြောင့် တရုတ်နိုင်ငံသို့ ဝင်/ထွက်လျက် ရှိသည့် သင်္ဘောများ၌ လိုက်ပါတာဝန်ထမ်းဆောင်ရာတွင် တရားမဝင်မှောင်ခိုပစ္စည်းများ တင်ဆောင် သည်ဟု ယူဆရသည့်သင်္ဘောများတွင် လိုက်ပါမှုမရှိစေရေး သက်ဆိုင်သူအားလုံးက ဝိုင်းဝန်းပူးပေါင်း ပါဝင်ကြပါရန်နှင့် အထူးဂရုပြု ဆောင်ရွက်ကြပါရန် မြန်မာသံရုံး၊ ပေကျင်းမြို့ က၂၀၂၂ ခုနှစ်၊ မေလ ၉ ရက်နေ့တွင် သတင်းတစ်ရပ်ထုတ်ပြန်ထားကြောင်းသိရသည်။