မော်စကို၊ မတ် ၁၃
ယူကရိန်းအကျပ်အတည်းနှင့်ပတ်သက်၍ ဆွေးနွေးရန် အမေရိကန်တာဝန်ရှိသူများသည် မော်စကိုမြို့သို့ ရောက်ရှိလာခဲ့ကြောင်း ရုရှားမီဒီယာများက ကြာသပတေးနေ့တွင် ဖော်ပြခဲ့သည်။
အဆိုပါအဖွဲ့ကို အမေရိကန်သမ္မတ ဒေါ်လ်နယ်လ် ထရမ့် ၏ အထူးကိုယ်စားလှယ် စတိဗ် ဝတ်ကော့ဖ် က ဦးဆောင်ခဲ့ကြောင်း TASS သတင်းဌာနက ဖော်ပြခဲ့သည်။
အမေရိကန် စေ့စပ်ညှိနှိုင်းရေးမှူးများနှင့် ဆက်သွယ်ရန် စီစဉ်ထားကြောင်း ခရင်မ္မလင် ပြောရေးဆိုခွင့်ရှိသူ ဒီမီထွီ ပက်စကော့ဖ် က ကြာသပတေးနေ့ အစောပိုင်းတွင်ပြောကြားခဲ့သည်။
ရုရှားသမ္မတလက်ထောက် ယူရီ အူရှာခေါဗ် နှင့် ထရမ့် ၏ နိုင်ငံတော်လုံခြုံရေးအကြံပေး မိုက် ဝေါဇ့် တို့သည် ဗုဒ္ဓဟူးနေ့တွင် ဖုန်းဖြင့်စကားစမြည်ပြောဆိုခဲ့ပြီး ပြောဆိုစဉ်အတွင်း “အချို့သောသတင်းအချက်အလက်များ” ကို ရုရှားသို့ ပေးအပ်ခဲ့ကြောင်း ပက်စကော့ဖ် မှပြောကြားခဲ့သည်။
ရုရှားသမ္မတ ဗလာဒီမာပူတင်သည် ကြာသပတေးနေ့ညနေတွင် နိုင်ငံတကာဖုန်းခေါ်ဆိုမှု ပြုလုပ်နိုင်ပြီး အခြားအဆက်အသွယ်များရှိနိုင်ကြောင်းကိုလည်း မငြင်းပယ်ထားပေ။
ရုရှားနိုင်ငံခြားရေး ဝန်ကြီးဌာန ပြောရေးဆိုခွင့်ရှိသူ မာရီယာ ဇာခါရိုဗာ က မော်စကိုသည် ဆော်ဒီအာရေဗျနိုင်ငံ ဂျက်ဒါမြို့ တွင် မကြာသေးမီကပြုလုပ်ခဲ့သော အမေရိကန်-ယူကရိန်း အစည်းအဝေးကို အနီးကပ် စောင့်ကြည့်နေပြီး ၎င်းတို့၏ ပူးတွဲထုတ်ပြန်ချက်ကို ပြန်လည်သုံးသပ်ခဲ့ကြောင်း ကြာသပတေးနေ့တွင် ပြောကြားခဲ့သည်။ ရုရှားသည် ကြာသပတေးနေ့တွင် ဖြစ်နိုင်ချေရှိသော အဆိုပြုချက်များကို အမေရိကန်နှင့် ဆွေးနွေးရန် အသင့်ရှိကြောင်း ၎င်းက ပြောကြားခဲ့သည်။
ဂျက်ဒါ မြို့မှာ အမေရိကန် ကိုယ်စားလှယ်အဖွဲ့နဲ့ ဆွေးနွေးပြီးနောက် ယူကရိန်းက “ချက်ခြင်း ကြားဖြတ် ယာယီရက် ၃၀ အပစ်အခတ်ရပ်စဲရေး” အတွက် အမေရိကန်ရဲ့ အဆိုပြုချက်ကို လက်ခံဖို့ အဆင်သင့်ဖြစ်နေကြောင်း အင်္ဂါနေ့က အချက်ပြလိုက်ကြောင်း သူတို့၏ ပူးတွဲကြေညာချက်မှာ ဖော်ပြထားပါသည်။
အပစ်အခတ်ရပ်စဲရေးကို အပြန်အလှန်သဘောတူညီချက်ဖြင့် သက်တမ်းထပ်တိုးနိုင်သည်ဟုလည်း ကြေညာချက်တွင်ဖော်ပြထားပြီး “ရုရှားနှင့်အပြန်အလှန်ဆက်ဆံရေးသည် ငြိမ်းချမ်းရေးရရှိရန် အဓိကသော့ချက်ဖြစ်သည်” ဟုလည်း ရုရှားနိုင်ငံသို့ ပြောဆိုသွားမည်ဖြစ်ကြောင်းလည်း ထည့်သွင်းပြောကြားခဲ့သည်။
Ref: ရှင်းဟွာ