ရန်ကုန်မြို့၊ အလုံမြို့နယ်ရှိ ရန်ကုန်တရုတ်ယဉ်ကျေးမှုစင်တာတွင် လူကြိုက်များသော တရုတ်ရုပ်ရှင်ဇာတ်ကားကောင်းများကို အပတ်စဉ် စနေနေ့တိုင်း ပြသပေးလျက်ရှိကြောင်း သိရသည်။
ရန်ကုန်တရုတ်ယဉ်ကျေးမှုစင်တာ၏ “Weekend ရုပ်ရှင်အစီအစဉ်”အတွက် လူကြိုက်များသော တရုတ်ရုပ်ရှင်ဇာတ်ကားကောင်း (၁၀)ကားကို ရွေးချယ်ထားပြီး အပတ်စဉ် စနေနေ့တိုင်း ဇာတ်ကား (၁)ကားနှုန်းဖြင့် ပြသပေးနေခြင်းဖြစ်ကြောင်း သိရသည်။
အဆိုပါ တင်ဆက်ပြသမှုကို မည်သူမဆို အခမဲ့ဝင်ရောက်ကြည့်ရှုနိုင်ပြီး မှတ်ပုံတင်သို့မဟုတ် သက်သေခံကတ်ပြား ယူဆောင်လာရန် လိုအပ်ကြောင်း သိရသည်။
ပွဲတော်ပိတ်ရက်များ သို့မဟုတ် အခြားသော အစီအစဉ်များနှင့် အချိန်တိုက်မှုများကြောင့် အပြောင်းအလဲတစ်စုံတစ်ရာရှိပါက ပြောင်းလဲပြင်ဆင်မှုအတွက် ကြိုတင်အကြောင်းကြားပေးမည်ဟု ရန်ကုန်တရုတ်ယဉ်ကျေးမှုစင်တာက အသိပေးထုတ်ပြန်ထားသည်။
ဤအစီအစဉ်သည် ရုပ်ရှင်ဝါသနာရှင်များအတွက် ကောင်းမွန်သော အခွင့်အလမ်းတစ်ခုဖြစ်ပြီး တရုတ်ယဉ်ကျေးမှုနှင့် ရုပ်ရှင်အနုပညာကို စိတ်ဝင်စားသူများ အတွက် လေ့လာနိုင်သည့် အခွင့်အရေးတစ်ရပ်လည်း ဖြစ်ကြောင်း သိရသည်။