ယနေ့ ဧပြီ ၁၃ ရက်တွင်ကျရောက်သည့် သင်္ကြန်အကြိုနေ့အား ရန်ကုန်တိုင်းအတွင်း၌ စတုဒိသာကျွေးမွေးခြင်း၊ ကုသိုလ်ကောင်းမှုပြုလုပ်ခြင်းများဖြင့် ဆင်နွဲလျက်ရှိကြသည်။
ရန်ကုန်တိုင်းအစိုးရအဖွဲ့၏ကြီးကြပ်မှုဖြင့် ဇီဝိတဒါ နငါးလွှတ်ပွဲအဖြစ် ဒဂုံမြို့သစ်(မြောက်ပိုင်း)မြို့နယ်ရှိ နတ်ရေကန်၌ ရန်ကုန်တိုင်းဝန်ကြီးချုပ်ဦးစိုးသိန်းဦးဆောင်ကာ ငါးမြစ်ကြင်းကောင်ရေ(၅၀၀၀)ကို နတ်ရေကန်အတွင်းသို့ လွှတ်ပေးခဲ့ကြပြီး ပြည်သူ့ရင်ပြင်တွင်လည်း စတုဒိသာများကျွေးမွေးနေမှုကို ကြည့်ရှုအားပေးခဲ့သည်။
ထို့အတူ ရန်ကုန်မြို့တော်စည်ပင်ရုံးဝင်းအတွင်း၌လည်း စတုဒိသာကျွေးမွေးမှုများကို ရန်ကုန်တိုင်းဝန်ကြီးချုပ်ဦးစိုးသိန်းက ကြည့်ရှုအားပေးပြီး သပြေခက်ဖြင့်ရေပက်ဖြန်းပေးခဲ့သည်။
ထို့ပြင် ရွှေတိဂုံစေတီတော်မြတ်ကြီးအားလာရောက်ဖူးမြှော်ကြသူများအား စေတီတော်မြတ်ကြီး၏ အနောက်ဘက်မုခ် ယာဥ်ရပ်နားရာနေရာ၌ဘာသာပေါင်းစုံချစ်ကြည်ညီညွတ်ရေးအဖွဲ့က စတုဒိသာများကျွေးမွေးခဲ့ကြပြီးမြို့နယ်အသီးသီးတွင်လည်း စတုဒိသာများကျွေးမွေး၍ သင်္ကြန်အကြိုနေ့အား အေးသင်္ကြန်အဖြစ်ဖြတ်သန်းလျက်ရှိကြသည်။