ရုရှားဓါတ်ငွေ့ပေးပို့မှုကိုရပ်လျှင်ယူကရိန်းကိုဓါတ်အားဖြတ်မည်–ဆလိုဗက်

ဇန်နဝါရီ ၁ ရက်နောက်ပိုင်းတွင် ဆလိုဗက်သို့ ရုရှားဓါတ်ငွေ့ တဆင့်ခံပေးပို့နေမှုအား ယူကရိန်းက ရပ်ဆိုင်းခဲ့မည်ဆိုပါက လျှပ်စစ်ဓါတ်အားပေးဝေမှုကို ရပ်တန့်ခြင်းအပါအဝင် ယူကရိန်းအပေါ် တုန့်ပြန်ရန်အစီအစဥ်များကိုသူ့အစိုးရက အကဲဖြတ် သုံးသပ်သွားမည်ဟု ဆလိုဗက်ဝန်ကြီးချုပ် ရောဘတ်ဖီကိုက ဒီဇင်ဘာ ၂၇ ရက်တွင် ကြေညာခဲ့သည်။

“ဇန်နဝါရီ ၁ ရက်နောက်ပိုင်းမှာ ယူကရိန်းအပေါ် တုန့် ပြန်မယ့်အစီအမံတွေနဲ့ အခြေအနေ တွေကို အကဲဖြတ်သွားမှာပါ” ဟု ဗီဒီယိုမိန့်ခွန်းတွင် ဖီကိုက ပြောဆိုခဲ့သည်။

ရှောင်လွှဲ၍မရပါက ဓါတ်အားစနစ် ချို့ယွင်းနေသောကာလအတွင်း ယူကရိန်းလိုအပ်နေသော ဓါတ်အားပေးဝေမှုကို ရပ်တန့်သွားမည်ဟု သူက ပြောဆိုခဲ့ပြီး ယူကရိန်းမှတဆင့် ဓါတ်ငွေ့သယ်ယူပို့ဆောင်မှု ရပ်ဆိုင်းခြင်းသည် အီးယူ၏ ယှဉ်ပြိုင်နိုင်စွမ်းကို ထိခိုက်စေမည်ဟုလည်း ဆိုခဲ့သည်။

ဒီဇင်ဘာ ၃၁ ရက်နောက်ပိုင်းတွင် ယူကရိန်းမှတဆင့် ဥရောပသို့ ရုရှားဓါတ်ငွေ့သယ်ဆောင်မှုဆိုင်ရာ သဘောတူညီချက်ကို သက်တမ်းတိုးတော့မည်မဟုတ်ဟု ကိဗ်က ပြောဆိုခဲ့ပြီးနောက် ဖီကိုသည် ဒီဇင်ဘာ ၂၂ ရက်တွင် မော်စကို၌ ရုရှားသမ္မတ ဗလာဒီမာပူတင်နှင့် တွေ့ဆုံကာ ဓါတ်ငွေ့ပေးပို့မှုနှင့် ပတ်သက်၍ ဆွေးနွေးခဲ့သည်။

ရုရှားက ယူကရိန်းကို ကျူးကျော်ခဲ့ပြီးနောက် ဥရောပသမဂ္ဂသည် ရုရှား၏ ရုပ်ကြွင်းလောင်စာအပေါ် မှီခိုအားထားမှုကို လျှော့ချရေးအစီအမံများလုပ်ဆောင်ခဲ့သော်လည်း ဆလိုဗက်ကီးယား၊ ဟန်ဂေရီနှင့် သြစတြီးယားအပါအဝင် နိုင်ငံများစွာသည် ရုရှားဓါတ်ငွေ့အပေါ် ဆက်လက်အမှီပြုနေရဆဲဖြစ်သည်။

ဆလိုဗက်ကီးယားသည် ရုရှားနိုင်ငံပိုင် စွမ်းအင်ကုမ္ပဏီကြီး Gazprom နှင့် နှစ်ရှည်စာချုပ်ချုပ်ဆိုထားပြီး အစားထိုးအစီအစဉ်များလုပ်ဆောင်ခဲ့ပါက သယ်ယူပို့ဆောင်စရိတ် ဒေါ်လာ ၂၂၈ ဒဿမ ၇၃ သန်း ထပ်မံကုန်ကျနိုင်သည်ဟု ခန့်မှန်းထားသည်။