ရေအမြောက်နှင့်ထိုးသည့်ကိစ္စ ဖိလစ်ပိုင်က တရုတ်ကို အပြင်းထန်ဆုံး ကန့်ကွက်မှုလုပ်

အငြင်းပွားတောင်တရုတ်ပင်လယ်ရေပြင်မှာ တရုတ်ကမ်းခြေစောင့်တပ်က ရေအမြောက်နဲ့ထိုးပက်ခဲ့တာကြောင့် ဖိလစ်ပိုင်ရေတပ်သား သုံးဦး ဒဏ်ရာရခဲ့ကာ ၎င်းတို့ရဲ့ သင်္ဘောကြီးကြီးမားမား ထိခိုက်မှုဖြစ်ခဲ့တဲ့ကိစ္စနဲ့ပတ်သက်ပြီး တနင်္လာနေ့မှာ ဖိလစ်ပိုင်က တရုတ်ကို အပြင်းထန်ဆုံး ကန့်ကွက်လွှာပို့ခဲ့သလို အကြီးတန်းတရုတ်သံတမန်တစ်ဦးကိုလည်း ဆင့်ခေါ်ကန့်ကွက်မှုလုပ်ခဲ့တယ်လို့ တာဝန်ရှိသူတွေက ပြောဆိုပါတယ်။

အငြင်းပွား Second Thomas သောင်ခုံကျွန်းအနီး ပိုင်နက်လု အာရှနှစ်နိုင်ငံအကြား အဆိုးဝါးဆုံးနဲ့ နောက်ဆုံးပေါ်ပေါက်လာတဲ့ စနေနေ့က ထိပ်တိုက်တွေ့မှုမှာ တရုတ်ကမ်းခြေစောင့်တပ် သင်္ဘောနှစ်စင်းက ဖိလစ်ပိုင်ရေတပ်ရဲ့ ရိက္ခာပို့သင်္ဘောကို ရေအမြောက်နဲ့ထိုးခဲ့တာဖြစ်ပါတယ်။ ယင်းကျွန်းနေရာမှာ စခန်းချထားတဲ့ ဖိလစ်ပိုင်တပ်ဖွဲ့ကို ဖယ်ထုတ်ဖို့ရာ တရုတ်သင်္ဘောတွေက ဝိုင်းထားခဲ့တယ်လို့လည်း သိရပါတယ်။

တရုတ်ကတော့ ဖိလစ်ပိုင်သင်္ဘောတွေဟာ တရုတ်ရေပိုင်နက်အတွင်း ကျူးကျော်ဝင်ရောက်ခဲ့တယ်လို့ စွပ်စွဲခဲ့ပြီး ၎င်းတို့ရဲ့ အချုပ်အခြာနဲ့ ရေကြောင်းပိုင်နက်ဆိုင်ရာ အခွင့်အရေးတွေအပေါ် အခိုင်အမာကာကွယ်စောင့်ရှောက်ဖို့အတွက် ပြတ်သားတဲ့ အရေးယူဆောင်ရွက်မှုတွေ ဆက်လုပ်သွားမှာဖြစ်တယ်လို့ တရုတ်ကာကွယ်ရေးဝန်ကြီးဋ္ဌာနက တနင်္ဂနွေနေ့မှာ သတိပေးခဲ့ပါတယ်။

ဒါ့အပြင် မနီလာရှိ တရုတ်သံရုံးကလည်း ဖိလစ်ပိုင်ကို မီးနဲ့မကစားဖို့ တရုတ်ကမ်းခြေစောင့်တပ်က သတိပေးထားတဲ့ ထုတ်ပြန်ချက်ကို ဖော်ပြခဲ့ပါတယ်။

ဖိလစ်ပိုင် လက်ထောက်နိုင်ငံခြားရေးဝန်ကြီး ထရီစာ လာဇာရိုက ရိက္ခာထောက်ပံ့ခြင်းနဲ့ တပ်သားအလှည့်ကျ အပြောင်းအလဲလုပ်တဲ့ ဖိလစ်ပိုင်ရဲ့ မစ်ရှင်အပေါ် တရုတ်ကမ်းခြေစောင့်တပ်နဲ့ တရုတ်ပြည်သူ့စစ်တွေရဲ့ ပြင်းထန်တဲ့လုပ်ဆောင်ချက်တွေကို ဖိလစ်ပိုင်က အပြင်းထန်ဆုံး ကန့်ကွက်တယ်လို့ သူမနဲ့ အဆင့်တူ အကြီးတန်းတရုတ်အရာရှိကို ဖန်းဆက်သွယ်ပြောဆိုခဲ့ကြောင်း နိုင်ငံခြားရေးရာဋ္ဌာနက ထုတ်ပြန်ပါတယ်။

ဒါ့အပြင် ယင်းကိစ္စနဲ့ပတ်သက်ပြီး မနီလာရှိ တရုတ်နိုင်ငံ အကြီးတန်းသံတမန်တစ်ဦးကို ဆင့်ခေါ်ကန့်ကွက်ခဲ့ကာ ဖိလစ်ပိုင်ရဲ့ သီးသန့်စီးပွားရေးဇုန်အတွင်းတည်ရှိတဲ့ Second Thomas သောင်ခုံကျွန်းကျင်ကနေ တရုတ်သင်္ဘောတွေ ချက်ချင်းထွက်ခွာပေးဖို့နဲ့ တရုတ်အနေနဲ့ နိုင်ငံတကာဥပဒေအပေါ် ချိုးဖောက်တာတွေကို ရပ်တန့်ဖို့ တောင်းဆိုခဲ့တယ်လို့လည်း ထုတ်ပြန်ချက်မှာ ဆက်လက် ဖော်ပြခဲ့ပါတယ်။

ဖိလစ်ပိုင် ကာကွယ်ရေး၊ လုံခြုံရေးနဲ့ နိုင်ငံခြားရေး အရာရှိတွေဟာ တောင်တရုတ်ပင်လယ်မှာ တရုတ်နိုင်ငံရဲ့ လက်မခံနိုင်ဖွယ်ရာ၊ ရန်စတဲ့လုပ်ရပ်တွေနဲ့ ပတ်သက်ပြီး ကိုင်တွယ်ဖြေရှင်းရေး ခြေလှမ်းသစ်များအတွက် တနင်္လာနေ့မှာ တွေ့ဆုံဆွေးနွေးခဲ့ကြပါတယ်။ သူတို့တွေရဲ့ အကြံပြုချက်တွေကို သမ္မတ ဖာဒီနန်မားကို့စ်ဂျုနီယာထံ တင်ပြသွားမှာဖြစ်ကြောင်းနဲ့ လတ်တလောမှာ လူသိရှင်းကြား ထုတ်ဖော်အသိပေးမှာ မဟုတ်ကြောင်း သိရပါတယ်။

Ref:abc News