လက်ရှိနိုင်ငံရေး အကျပ် အတည်းများကို နိုင်ငံရေးနည်းလမ်းဖြင့် ဆွေးနွေးအဖြေရှာသွားရန် ဆုံးဖြတ်

လက်ရှိနိုင်ငံရေး အကျပ် အတည်းများကို နိုင်ငံရေးနည်းလမ်းဖြင့် ဆွေးနွေးအဖြေရှာသွားရန် ဆုံးဖြတ်

တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် လက်မှတ်ရေးထိုးထားသော တိုင်းရင်းသားလက်နက်ကိုင်တော်လှန်ရေးအဖွဲ့အစည်းများ၏စတုတ္ထအကြိမ်မြောက် NCA-S EAO ထိပ်သီးခေါင်းဆောင်များ ညီလာခံ (ဒုတိယပိုင်း)က လက်ရှိနိုင်ငံရေးအကျပ်အတည်းအား အထက်ပါအတိုင်း ဆုံးဖြတ်ခဲ့ကြခြင်းဖြစ်သည်။

လက်ရှိနိုင်ငံရေးအခင်းအကျင်းနှင့် ကိုက်ညီမှုရှိစေရန်အတွက် PPST ၏ လက်ရှိစုဖွဲ့မှုကို ပြင်ဆင်ဖွဲ့စည်းရန်နှင့် လက်ရှိမြန်မာ ပြည်၏နိုင်ငံရေးအကျပ်အတည်းကို နည်းလမ်းရှာဖြေရှင်းနိုင်စေရန် စသည့် အဓိကရည်ရွယ်ချက်များဖြင့် တစ်နိုင်ငံလုံးပစ်ခတ်တိုက် ခိုက်မှုရပ်စဲရေး သဘောတူစာချုပ်လက်မှတ်ရေးထိုးထားသော တိုင်းရင်းသားလက်နက်ကိုင် တော်လှန်ရေးအဖွဲ့အစည်းများ၏ စတုတ္ထ အကြိမ်မြောက် NCA-S EAO ထိပ်သီးခေါင်းဆောင်များ ညီလာခံ (ဒုတိယပိုင်း)ကို ၂၀၂၂ ခုနှစ်၊ မတ်လ (၂၉) ရက်နေ့မှ ဧပြီလ (၂) ရက်နေ့ အထိ ထိုင်းနိုင်ငံချင်းမိုင်မြို့တွင် အောင်မြင်စွာ ကျင်းပခဲ့ပြီးနောက် စုဝေးဆုံးဖြတ်ခဲ့ကြခြင်းလည်းဖြစ်သည်။

ဤညီလာခံမှ ငြိမ်းချမ်းရေး လုပ်ငန်းစဉ် ဦးဆောင်အဖွဲ့ (PPST) ပြန်လည်စုဖွဲ့မှုပုံစံ၊ PPST စုဖွဲ့မှုအသစ်အတွက် လုပ်ငန်းလမ်းညွှန် (TOR)နှင့် PPST ၏ နိုင်ငံရေးလမ်းပြမြေပုံဆိုင်ရာအဆိုပြုချက်တို့အား အကျေအလည်ဆွေးနွေး ညှိနှိုင်းခဲ့ ကြပြီး အတည်ပြုနိုင်ခဲ့သည်ဟုပါ ထည့်သွင်းသတင်းထုတ်ပြန်ခဲ့ကြသည်။

ယင်းအပြင် လတ်တလော အရေးပေါ်လိုအပ်နေသည့် လူသားချင်းစာနာထောက်ကူမှု အကူအညီများအတွက် နိုင်ငံတကာအသိုင်းအဝန်းနှင့် ညှိနှိုင်းပူးပေါင်း ဆောင်ရွက်ရေးကိစ္စ ရပ်များအပါအဝင် နိုင်ငံတကာဆက်ဆံရေးကိစ္စရပ်များအား စုစုစည်းစည်းဖြင့် ဆွေးနွေးညှိနှိုင်းခဲ့ကြပြီးနောက် ထိုကဲ့သို့ နိုင်ငံရေးနည်းလမ်း ဖြင့် ဆွေးနွေးအဖြေရှာရာတွင် သက်ဆိုင်သူအားလုံးပါဝင်သည့်အဓိပ္ပါယ်ပြည့်ဝသော နိုင်ငံရေးဆွေးနွေးမှုလမ်း ကြောင်းကို အစဉ်တစိုက် ဦးတည်ဆောင်ရွက်သွားမည်ဟုပါ သတင်းထုတ်ပြန်ခဲ့ကြသည်။

ထို့နောက် အာဆီယံအထူးကိုယ်စားလှယ်၏ ပထမအကြိမ် မြန်မာနိုင်ငံခရီးစဉ်အတွင်း ကြိုးပမ်းဆောင်ရွက်ချက်များနှင့် ရှေ့ ဆက်ဆောင်ရွက်မည့် အစီအစဉ်များအပါအဝင် နိုင်ငံတကာအသိုင်းအဝိုင်း၏ ကြိုးပမ်းမှုများအပေါ် ကြိုဆိုခဲ့ကြသည်။