လမ်းများနှင့် အခြေခံအဆောက်အအုံများ ပျက်စီးခဲ့သဖြင့် မြန်မာငလျင်ဘေး လူသားချင်းစာနာမှုလုပ်ငန်းများ အဟန့်အတားဖြစ်ရ       

လမ်းများနှင့် အခြေခံအဆောက်အအုံများ ပျက်စီးခဲ့သောကြောင့် မြန်မာနိုင်ငံတွင် လူသားချင်းစာနာထောက်ထားမှုဆိုင်ရာ လုပ်ငန်းများကို အဟန့်အတားဖြစ်စေလျက်ရှိကြောင်း ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး(OCHA) က စနေနေ့တွင် ပြောကြားခဲ့သည်။
           
သောကြာနေ့က လှုပ်ခတ်ခဲ့သော ၇ ဒဿမ ၇ အဆင့်ရှိငလျင်ကြောင့် အဓိက တံတားများနှင့် လမ်းများ အပါအဝင် အရေးကြီးသည့် အခြေခံအဆောက်အအုံများ ပြင်းထန်စွာ ထိခိုက်ပျက်စီးခဲ့သဖြင့် အကူအညီလိုအပ်သော ဒေသများသို့ လူသားချင်းစာနာမှုလုပ်ငန်းများ လုပ်ဆောင်နိုင်ရန် ခက်ခဲသွားကြောင်း OCHA က ပြောဆိုသည်။
         
ရန်ကုန်-နေပြည်တော်-မန္တလေး အမြန်လမ်း ပျက်စီးမှုကြောင့် ဝန်ဆောင်မှုများ ပြတ်တောက်ခဲ့ပြီး အက်ကွဲကြောင်းဖြစ်ပေါ်မှုများ၊ လမ်းမျက်နှာပြင် ပုံပျက်ပန်းပျက်ဖြစ်ခဲ့မှုများကြောင့် အဝေးပြေးယာဉ်များ ရပ်နားထားရသည်ဟု ကုလအေဂျင်စီက ထုတ်ပြန်ချက်တွင် ပြောဆိုခဲ့သည်။
         
နိုင်ငံအလယ်ပိုင်းနှင့် အနောက်မြောက်ပိုင်းရှိ ဆေးရုံများသည် ငလျင်ကြောင့် ဒဏ်ရာရရှိခဲ့သော လူနာအများအပြားကို ကိုင်တွယ်စီမံနိုင်ရန် ရုန်းကန်နေရသည်ဟု အေဂျင်စီက ပြောသည်။ သွေးအိတ်များနှင့် ထုံဆေးများ အပါအဝင် လက်ရှိ ဆေးဝါးပြတ်လပ်မှုကို ဖြေရှင်းနိုင်ရန် အမိုးအကာနှင့် ဆေးဝါးထောက်ပံ့ရေးပစ္စည်းများ တင်ဆောင်လာသော ကုန်တင်ယာဉ် ၁၇ စီးသည် မတ် ၃၀ တွင် ရောက်ရှိလာမည်ဟု ဆိုသည်။
       
သောကြာနေ့က လှုပ်ခတ်ခဲ့သော အဆိုပါငလျင်သည် ပြီးခဲ့သည့် ရာစုနှစ်အတွင်း အရှေ့တောင်အာရှနိုင်ငံတွင် လှုပ်ခတ်ခဲ့သော အကြီးမားဆုံးငလျင်များတွင် ပါဝင်ခဲ့ပြီး ပြည်တွင်းစစ်ကြောင့် စီးပွားရေးပျက်ပြားကာ၊ စစ်ဘေးရှောင် သန်းချီရှိနေသောနိုင်ငံ၌ လေဆိပ်များ၊ တံတားများနှင့် အဝေးပြေးလမ်းများ ပျက်စီးခဲ့ရသည်။

Ref: ယဟျူးနူးစ်