အရှေ့မြောက်တိုင်းစစ်ဌာနချုပ် တည်ရှိရာ လားရှိုးမြို့မှ MNDAA တပ်ဖွဲ့များ ပြန်လည်ဆုတ်ခွာရန် ပြင်ဆင်နေသည်ဟု ဒေသခံသတင်းရင်းမြစ်တစ်ဦးက ပြောသည်။
သို့သော် မည်သို့သော ပုံစံဖြင့် ဆုတ်ခွာသွားမည်ဆိုခြင်းအပေါ် ၎င်းအနေဖြင့်
မသိရှိဘဲ ၊ MNDAA၏ တရားဝင်ထုတ်ပြန်မှုကို စောင့်ကြည့်ရမည်ဖြစ်သည်ဟု ဆိုသည်။
MNDAA အနေဖြင့် ယခင်က မေလပိုင်းအကုန်တွင် မြို့မှဆုတ်ခွာရန် ရှိနေသည်ဟု သတင်းများထွက်ပေါ်ခဲ့သော်လည်းယခုအခါ ဧပြီ နောက်ဆုံးပတ်အတွင်း အပြီးဆုတ်ခွာမည်ဆိုသည့်သတင်းများထွက်ပေါ်လာခြင်းဖြစ်သည်။
ယင်းသတင်းထွက်ပေါ်နေမှုအတွက် MNDAA ၏ တာဝန်ရှိသူများအား ပေါ်ပြူလာနယူးစ်က ဆက်သွယ်ရန်ကြိုးစားနေဆဲဖြစ်ပြီး၊ ယင်းနှင့်ပတ်သက်၍ ၎င်းတို့၏ The KoKang ဖေ့ဘွတ်စ်စာမျက်နှာတွင်လည်း အသိပေးဖော်ပြထားခြင်းမရှိသေးပေ။
“ဧပြီလကုန်ပိုင်းကစပြီး လားရှိုးမြို့ပေါ်ရပ်ကွက်တွေကနေ ကိုးကန်တပ်ဖွဲ့တွေ ဆုတ်ခွါဖို့ ပြင်နေတယ်လို့ ဒေသခံတွေကပြောပါတယ်။ မေလကုန်ပိုင်းမှာ ဆုတ်ခွါဖို့ စီစဉ်ထားတာကနေ ပြီးခဲ့တဲ့ ဆွေးနွေးပွဲအပြီးမှာ အစီအစဉ်တွေ ပြောင်းသွားခဲ့ပါတယ်။ မြို့နဲ့ သုံးလေးမိုင် ပတ်ဝန်းကျင် ကျေးရွာတွေကတော့ ကိုးကန့် အုပ်ချုပ်မှုအောက်မှာ ရှိနေမှာပါ”ဟု ဒေသခံသတင်းသမားတစ်ဦးကလည်း သူ၏လူမှုကွန်ရက်စာမျက်နှာတွင် ရေးသားမျှဝေထား သည်ကို တွေ့ရသည်။
တရုတ်နိုင်ငံအစိုးရ၏ ကြားဝင်ညှိနှိုင်းပေးမှုကြောင့် ကိုးကန့်တပ်နှင့် မြန်မာ့တပ်မတော်တို့အကြား တွေ့ဆုံဆွေးနွေးခဲ့ပြီး တရုတ်နိုင်ငံဘက်မှ ကိုးကန့်ဒေသဘက်သို့ ကုန်စည်စီးဆင်းခွင့်များ ပြန်လည်ဖွင့်လှစ်ပေးခဲ့သည့်အပြင် ဒေသတွင်း လျှပ်စစ်မီးအပါအဝင် အင်တာနက် ၊ ဖုန်းလိုင်းများ ပြန်လည်ဆက်သွယ်၍ ရရှိခဲ့ခြင်းဖြစ်သည်။
MNDAA သည် ၁၀၂၇ တိုက်ပွဲများအတွင်း ရှမ်းပြည်မြောက်ပိုင်းရှိ လောက်ကိုင်၊ ကုန်းကြမ်း၊ သိန္နီ၊ တာမိုညဲ၊ ချင်းရွှေဟော်၊ ကြူကုတ်၊ ဖောင်းစိုင် နှင့်လားရှိုးမြို့အစသည့် (၈)မြို့တို့ကို စိုးမိုးခဲ့ခြင်းဖြစ်သည်။
နစက အနေဖြင့် ဧပြီ ၂၂ ရက်နေ့ထိ အပစ်ရပ်ထားမှု၊ အဖွဲ့စည်းများ၏ တိုင်းပြည်အပေါ် ဝိုင်းဝန်း တည်ဆောက်လိုမှုတို့ မည်မျှ ပေါင်းစပ်နိုင်မည်လဲ ဆိုသည်ကစိတ်ဝင်စားစရာပင်။
ဓာတ်ပုံ-Ko KoKang