ဘင်္ဂလားပင်လယ်အော်နှင့် ကပ္ပလီပင်လယ်ပြင်အတွင်း လေဖိအားနည်းရပ်ဝန်းဖြစ်နိုင်ချေ ၄၀ ရာခိုင်နှုန်း အထိ လျော့ကျလာသောကြောင့် အထက်ဘက်ငလျင်လှုပ်ခတ်ခဲ့သည့် ဒေသများတွင် မိုးရွာနိုင်ချေ အလွန်နည်းပါးနိုင်မည်ဖြစ်ကြောင်း ပြင်ပ မိုးလေဝသပညာရှင် ဦးဝင်းနိုင်က လူမှုကွန်ရက်စာမျက်နှာတွင် ဧပြီ (၂) ရက် နံနက်အစောပိုင်းက ခန့်မှန်းရေးသားချက်အရ သိရသည်။
၎င်းက WINDY တွင် ECMWF, GFS နှင့် ICON model များက ဧပြီ (၄) ရက်တွင် အားပျော့သော လေဖိအားနည်းရပ်ဝန်းအဆင့် ဖြစ်လာနိုင်သည်ဟု ဖော်ပြထားကြောင်းနှင့် အမှန်တကယ်ဖြစ်လာနိုင်မည့် ဧပြီ (၄) ရက်အထိ အခြေအနေကို စောင့်ကြည့်ရပါဦးမည်ဟု ကိုးကားရေးသားထားသည်။
ဧပြီ (၅) ရက် နံနက် (၁) နာရီမှ ဧပြီ (၆) ရက် နံနက် (၁) နာရီအထိ (၂၄) နာရီအတွင်း၊ မိုးရွာနိုင်မည့် အခြေအနေတို့တွင် ဧရာဝတီတိုင်းဒေသကြီး၊ ရန်ကုန်တိုင်းဒေသကြီး၊ ပဲခူးတိုင်းဒေသကြီး၊ မွန်ပြည်နယ်၊ ကရင်ပြည်နယ်များတွင်သာ မိုးအနည်းငယ် (၂၄ နာရီအတွင်း ၁၆ မီလီမီတာခန့်(၀.၆၃ လက်မ) ခန့် ရွာနိုင်ကြောင်းနှင့် အထက်ဘက် ငလျင်လှုပ်ခတ်ခဲ့သည့် ဒေသများတွင် မိုးရွာနိုင်ချေ အလွန်နည်းပါးနိုင်မည် ဖြစ်ကြောင်း ဦးဝင်းနိုင်က ဆိုသည်။