နေပြည်တော်အပါအဝင် တိုင်းနှင့်ပြည်နယ်အများစု၌ မတ် ၂၈ ရက်မွန်းတည့်ပိုင်းကလှုပ်ခတ်ခဲ့သည့် အင်အားအလွန်ပြင်းထန်သော ငလျင်ဒဏ်ကြောင့် ဓာတ်အားလိုင်းများ၊ ဓာတ်အားခွဲရုံများ၊ ထရန်စဖော်မာများနှင့် ဆက်စပ်ပစ္စည်းများပျက်စီးချို့ယွင်းမှုများဖြစ်ပေါ်ခဲ့ပြီး လျှပ်စစ်ဓာတ်အားပြတ်တောက်မှုများဖြစ်ပေါ်လျက်ရှိသည်ဟု လျှပ်စစ်စွမ်းအားဝန်ကြီးဌာနက အသိပေးခဲ့သည်။
ထိုသို့ ပျက်စီးချို့ယွင်းမှုဖြစ်ပေါ်ခဲ့မှုများအနက် နေပြည်တော်ရှိ လျှပ်စစ်ဓာတ်အားပို့လွှတ်ရေးလိုင်းများနှင့် ပင်မဓာတ်အားခွဲရုံပျက်စီးခဲ့မှုများကို လျှပ်စစ်ဓာတ်အားပို့လွှတ်ရေးနှင့် ကွပ်ကဲရေးဦးစီးဌာနမှ လျှပ်စစ်ကျွမ်းကျင်ဝန်ထမ်း(၁၃၄)ဦး၊ ဓာတ်အားဖြန့်ဖြူးရေးလိုင်းများနှင့် ဓာတ်အားခွဲရုံများ ပြန်လည်ပြုပြင်နိုင်ရန် နေပြည်တော်ရှိ လျှပ်စစ် ကျွမ်းကျင်ဝန်ထမ်းများအပြင် ရန်ကုန်တိုင်း၊ ပဲခူးတိုင်းနှင့် မကွေးတိုင်းတို့မှ လျှပ်စစ်ကျွမ်းကျင်ဝန်ထမ်း (၄၂၆)ဦး(စုစုပေါင်းဝန်ထမ်းအင်အား ၅၆၀ ဦး)တို့ဖြင့် ဓာတ်အားအမြန်ပို့လွှတ်ဖြန့်ဖြူးနိုင်ရေးအတွက် ကြိုးပမ်းဆောင်ရွက်လျက်ရှိသည်ဟု အသိပေးခဲ့သည်။
ထို့အတူ မန္တလေးတိုင်းအတွင်း ပျက်စီးမှုများအား အမြန်ဆုံးပြင်ဆင်နိုင်ရန် မန္တလေးတိုင်းအတွင်းရှိ လျှပ်စစ်ကျွမ်းကျင်ဝန်ထမ်းများအပြင် ဧရာဝတီတိုင်း၊ ကရင်ပြည်နယ်နှင့် မွန်ပြည်နယ်တို့မှ လျှပ်စစ်ကျွမ်းကျင်ဝန်ထမ်း(၅၄၅)ဦးတို့ဖြင့် ဓာတ်အားအမြန်ပို့လွှတ်ဖြန့်ဖြူးနိုင်ရေးအတွက် ပြန်လည်ပြင် ဆင်တည်ဆောက်မှုများပြုလုပ်လျက်ရှိသည်ဟု အသိပေးခဲ့သည်။
ထိုသို့ ဆောင်ရွက်လျက်ရှိခြင်းအား နေပြည်တော်တွင် လျှပ်စစ်စွမ်းအားဝန်ကြီးဌာန ပြည်ထောင်စုဝန်ကြီး၊ မန္တလေးတိုင်းတွင် လျှပ်စစ်စွမ်းအားဝန်ကြီးဌာန ဒု-ဝန်ကြီးတို့ဦးစီး၍ စီမံဆောင်ရွက်လျက်ရှိသည်ဟုလည်း အသိပေးခဲ့သည်။
ထို့ကြောင့် လက်ရှိအချိန်၌ လျှပ်စစ်ဓာတ်အားပြတ်တောက်မှုများဖြစ်ပေါ်လျက်ရှိနေခြင်းကို ပြည်သူ များအနေဖြင့် နားလည်ပေးပါရန်လည်း လျှပ်စစ်စွမ်းအားဝန်ကြီးဌာနက အသိပေးခဲ့သည်။