ဆဋ္ဌမအကြိမ်မြောက် ဘင်းမ်စတက်ထိပ်သီးအ စည်းအဝေးတွင် နိုင်ငံအသီးသီးက လုံခြုံရေး၊ ကုန်သွယ်မှု၊ ကူးလူးဆက်ဆံရေးနှင့် သဘာဝဘေးအန္တရာယ် စီမံခန့်ခွဲမှုတို့ကို အဓိကထား၍ ပုံဖော်ဆွေးနွေး မီးမောင်းထိုးပြကြသည်။
မြန်မာ ဝန်ကြီးချုပ် ဆွေးနွေးပြောကြားခဲ့မှုများကိုကောက်နုတ်ဖော်ပြလိုက်ပါသည်။
အဖွဲ့ဝင်နိုင်ငံများအနက် ဘင်္ဂလားဒေ့ရှ်နိုင်ငံ၊ အိန္ဒိယနိုင်ငံ၊ သီရိလင်္ကာနိုင်ငံနှင့် မြန်မာနိုင်ငံတို့သည် သဘာဝဘေးအန္တရာယ်ကျရောက်မှုဒဏ်ကို မကြာခဏကြုံတွေ့ခံစားရလျက်ရှိ၍
” မိမိတို့အနေနဲ့ ရာသီဥတုပြောင်းလဲမှုဒဏ်ကိုတွေ့ ကြုံခံစားနေရပြီး ရာသီဥတုပြောင်းလဲမှုလျော့ပါးရေး ပြောင်းလဲလာတဲ့ရာသီဥတုနဲ့လိုက်လျောညီထွေဖြစ်အောင် ပူးပေါင်းဆောင်ရွက်မှုတွေကိုမြှင့်တင်ရပါမယ်။ အထူးသဖြင့် သဘာဝပတ်ဝန်းကျင်နဲ့ရာသီဥတုပြောင်းလဲမှုဆိုင်ရာ ဘင်းမ်စတက်လုပ်ငန်းစီမံချက် အကောင်အထည်ဖော်ရေးကို အလေး ထားဆောင်ရွက်ရပါမယ်”ဟု နစက ဥက္ကဋ္ဌက ပြော သည်။
ထို့ပြင် ဘင်းမ်စတက်အတွင်း ကြံ့ကြံ့ခံနိုင်စွမ်းတည်ဆောက်ရေးသည်အရေးကြီးကာ မိမိတို့ဒေသသည် ရာသီဥတုပြောင်းလဲမှု၊ သဘာဝဘေးအန္တရာယ်များ၊ ကပ်ရောဂါများနှင့် အခြားကြိုတင်မမြင်နိုင်သော အကျပ်အတည်းများအား ရင်ဆိုင်ကြုံတွေ့နေရသဖြင့် အကျပ်အတည်းစီမံခန့်ခွဲမှု၊ သဘာဝဘေးအန္တရာယ်အတွက်ကြိုတင်ပြင်ဆင်မှုနှင့် သဘာဝပတ်ဝန်းကျင်ရေရှည်တည်တံ့မှုတို့အ တွက်အစီအမံများကို ကြိုတင်ချမှတ်ဆောင်ရွက်ကြရမည်ဟု ပြောသည်။
” မိမိတို့အနေနဲ့ ကျန်းမာရေးစောင့်ရှောက်မှုစနစ်တွေ ခိုင်မာအောင်ဆောင်ရွက်ပြီး အနာဂတ်မှာ ကပ်ရောဂါတွေဖြစ်ပွားတဲ့အခါ ကာကွယ်ဆေးတွေ ဆေးဝါးတွေနဲ့ ဆေးပစ္စည်းတွေကို အချိန်နဲ့တစ်ပြေးညီရရှိဖို့စီမံဆောင်ရွက်ထားရပါမယ်။ ဒါ့အပြင် ကျန်းမာရေးဆိုင်ရာ ဒေသတွင်းပူးပေါင်းဆောင်ရွက်မှုကိုမြှင့်တင်ရာမှာအရေးပါတဲ့ ဘင်းမ်စတက်ပြည်သူ့ကျန်းမာရေးဆိုင်ရာလုပ်ငန်းစီမံချက် (၂၀၂၃-၂၀၂၅)ကို အချိန်မီအကောင်အထည်ဖော်ရာမှာ ဝိုင်းဝန်းပံ့ပိုးပေးကြဖို့ အဖွဲ့ဝင်နိုင်ငံအားလုံးကိုတိုက်တွန်းလိုပါတယ်”ဟု နစက ဥက္ကဋ္ဌက ပြောသည်။
မြန်မာ့ငလျင် ဖြစ်စဥ်အား အဖွဲ့ဝင်နိုင်ငံများက စာနာထောက်ထားမှုပြောဆိုခြင်း၊ ရှာဖွေကယ်ဆယ်ရေးအတွက်အချိန်တိုအတွင်းရောက်ရှိကူညီပေးခြင်း၊ ကယ်ဆယ်ရေးနှင့်စားသောက်ဖွယ်ရာများ အမြန်ပေးပို့ကူညီမှုများအတွက် မြန်မာပြည်သူများက ကျေးဇူးအထူးတင်ရှိသည်ဟုလည်း ပြောကြားခဲ့သည်။