သူလျှိုလုပ်သည်ဟု စွပ်စွဲကာ ဗြိတိန်သံတမန်ကို ရုရှားက နှင်ထုတ်

ရုရှားနိုင်ငံအတွင်းပိုင်းအထိ တိုက်ခိုက်ရာတွင် ဗြိတိန်၏လက်နက်များကို ယူကရိန်းကို အသုံးပြုခွင့် ပေးခဲ့၍ လန်ဒန်နှင့် မော်စကိုအကြား တင်းမာမှုမြင့်တက်နေစဉ် သူလျှိုလုပ်မှုကြောင့်ဟုဆိုကာ ရုရှားက ဗြိတိန်သံတမန်တစ်ဦးကို နိုင်ငံမှ နှင်ထုတ်လိုက်သည်။

နိုင်ငံတော်လုံခြုံရေးကို ခြိမ်းခြောက်သည့် ထောက်လှမ်းမှု နှင့် အဖျက်အမှောင့်လုပ်ရပ်များတွင် ပါဝင်နေသည့်အထောက်အထား စာရွက်စာတမ်းများ ကို တွေ့ရှိမှု တို့ဖြင့် ဗြိတိန်သံတမန်တစ်ဦးကို အရေးယူဆောင်ရွက်ခဲ့သည်ဟု ရုရှား၏ ပြည်တွင်းလုံခြုံရေးအေဂျင်စီ FSB က ကြေညာခဲ့သည်။

ဗြိတိန်သံတမန်သည် ရုရှားနိုင်ငံသို့ ပြည်ဝင်ခွင့်လျှောက်ထားရာတွင် အချက်အလက်အမှားများကို ရည်ရွယ်ချက်ချက်ရှိရှိ ပေးခဲ့ခြင်းဖြင့် ရုရှားနိုင်ငံ ဥပဒေကို ချိုးဖောက်ခဲ့သည်ဟု FSB အခိုင်အမာပြောဆိုသည်။ အဆိုပါ သံတမန်ကို နိုင်ငံတွင်းမှ ထွက်သွားရန် ရက်သတ္တနှစ်ပတ် အချိန်ပေးထားသည်ဟု ရုရှားမီဒီယာက ဖော်ပြသည်။

FSB ၏ အဆိုအရ ရုရှားရုပ်သံသတင်းများတွင် ဓါတ်ပုံနှင့်တကွ ဖော်ပြခံရသည့် ဗြိတိန်သံတမန်သည် သြဂုတ်လအတွင်းက နှင်ထုတ်ခံခဲ့ရသည့် ဗြိတိန်သံတမန် ခြောက်ဦးအနက် တစ်ဦး၏နေရာကို အစားထိုးတာဝန်ပေးခဲ့ခြင်းဟုဆိုသည်။ ယင်းသံတမန်ခြောက်ဦးကိုလည်း သူလျှိုလုပ်မှုစွဲချက်ဖြင့် တိုင်းပြည်မှ နှင်ထုတ်ခဲ့ခြင်းဖြစ်ပြီး စွပ်စွဲချက်သည် အခြေအမြစ်မရှိဟု ဗြိတိန်နိုင်ငံခြားရေးဌာန၊ ဓနသဟာယနှင့် ဖွံ့ဖြိုးတိုးတက်ရေးရုံး(FCDO) က ယင်းအချိန်က ပြောဆိုခဲ့သည်။

မော်စကိုရှိ ဗြိတိန်သံအမတ် နီဂျယ် ကာဆီကို ဆင့်ခေါ်ခဲ့သည်ဟု ရုရှားနိုင်ငံခြားရေးဝန်ကြီးဌာနက ပြောဆိုခဲ့သည်။ ယခုကိစ္စနှင့် ပတ်သက်၍ FCDO က လတ်တလောတွင် မှတ်ချက်ပြု ပြောဆိုခြင်း မရှိသေးပေ။

Ref: သည်ဂါးဒီးယန်း