သံတမန်ဆက်ဆံရေးရွှေရတု မတိုင်မီစင်္ကာပူနှင့်လာအိုတို့ပူးပေါင်းဆောင်ရွက်ရေး ခိုင်မြဲစေရန်ကြိုးပမ်းမည်

သံတမန်ဆက်ဆံရေးရွှေရတု မတိုင်မီစင်္ကာပူနှင့်လာအိုတို့ပူးပေါင်းဆောင်ရွက်ရေး ခိုင်မြဲစေရန်ကြိုးပမ်းမည်

စင်္ကာပူ၊စက်တင်ဘာ ၂၈

စင်္ကာပူနှင့်လာအိုနိုင်ငံတို့သည် ရေရှည်တည်တံ့ခိုင်မြဲမှုနှင့် သဘာဝပတ်ဝန်းကျင်ကာကွယ်ရေးသာမက မြို့ပြစီမံကိန်းနှင့်ထောက်ပံ့ပို့ဆောင်ရေး အပါအဝင်နယ်ပယ်အသီးသီးတွင် ပူးပေါင်းဆောင်ရွက်မှုကိုခိုင်မာအားကောင်း အောင် ဆောင်ရွက်မည်ဖြစ်ကြောင်း ဝန်ကြီးချုပ်လီရှန်လွန်းက စက်တင်ဘာ ၂၈ ရက်တွင်ပြောကြားခဲ့သည်။

စင်္ကာပူနိုင်ငံသို့တရားဝင်လာရောက်လည်ပတ်‌နေသော လာအိုဝန်ကြီးချုပ် မစ္စတာ Phankham Viphavanh အား ဂုဏ်ပြုသည့်အနေဖြင့် နေ့လည်စာနှင့်ဂုဏ်ပြုမိန့်ခွန်းပြောကြားဧည့်ခံခဲ့သည်။လာအိုဝန်ကြီးချုပ်၏ခရီးစဉ်သည် ၂၀၂၄ ခုနှစ်တွင် အရေးကြီးသောမှတ်တိုင်တစ်ခုသို့ရောက်ရှိမည့် လာအိုနှင့်စင်္ကာပူတို့၏သံတမန်ဆက်ဆံရေးနှစ် ၅၀ ပြည့်အထိမ်းအမှတ်မတိုင်မီ ပြုလုပ်ခဲ့ခြင်းဖြစ်သည်။

နှစ်နိုင်ငံစွမ်းအင်ပူးပေါင်းဆောင်ရွက်မှုဆိုင်ရာ သဘောတူညီချက်ကို လက်မှတ်ရေးထိုးခဲ့ပြီး သဘာဝပတ်ဝန်းကျင်ထိန်းသိမ်းရေး၊ရာသီဥတုပြောင်းလဲမှုနှင့် ရေအရင်းအမြစ်စီမံခန့်ခွဲမှုဆိုင်ရာ လက်ရှိသဘောတူညီချက်ကိုလည်း သက်တမ်းတိုးခဲ့ကြောင်း မစ္စတာလီကပြောကြားခဲ့သည်။

အသိပညာနှင့်ကျွမ်းကျင်မှုများအပြန်အလှန်ဖလှယ်ရာတွင် လွယ်ကူချောမွေ့စေပြီး နှစ်နိုင်ငံစီးပွားရေးလုပ်ငန်းများအတွက် တိုးတက်မှုအခွင့်အလမ်းများဖန်တီးပေးမည်ဖြစ်ကြောင်း၎င်းကဆိုသည်။အဆိုပါသဘောတူညီချက်များသည် နှစ်နိုင်ငံစွမ်းအင်ဆိုင်ရာ ပူးပေါင်းဆောင်ရွက်မှုကို ပိုမိုခိုင်မာစေမည်ဖြစ်ကြောင်း၎င်းကပြောကြားခဲ့သေးသည်။

စွမ်းအင်ပူးပေါင်းဆောင်ရွက်မှုအပြင် နှစ်နိုင်ငံသည်မြို့ပြစီမံကိန်းနှင့် ထောက်ပံ့ပို့ဆောင်ရေးအပါအဝင် အခြားနယ်ပယ်များစွာတွင်လည်း အတူတကွလုပ်ဆောင်နိုင်သည်ဟု မစ္စတာလီကပြောကြားခဲ့သည်။

၂၀၂၄ ခုနှစ်တွင် အာဆီယံဥက္ကဌအဖြစ်တာဝန်ယူမည့် လာအိုနိုင်ငံအားပံ့ပိုးကူညီသွားမည်ဟုလည်း မစ္စတာလီက ထပ်မံကတိပြုခဲ့သည်။လာအို၏အာဆီယံဥက္ကဌတာဝန်ကိုပံ့ပိုးပေးမည့် စွမ်းရည်မြှင့်တင်ရေး အစီအစဉ်များပါဝင်သည့် တိုးမြှင့်ပူးပေါင်းဆောင်ရွက်ရေး အစီအစဉ်ကိုလည်း အကောင်အထည်ဖော်ဆောင်ရွက်သွားမည်ဖြစ်ကြောင်းပြောကြားခဲ့သည်။

Source – CNA/vl(ta)