ဟနွိုင်တွင် ကော်ဖီဆိုင် မီးရှို့ခံရ၍ လူ ၁၁ ဦး ‌ေ-သဆုံး

ဗီယက်နမ်နိုင်ငံ မြို့တော်ဟနွိုင်ရှိ ကော်ဖီဆိုင်တစ်ခု ဗုဒ္ဓဟူးနေ့ညက မီးလောင်မှုဖြစ်ပွားခဲ့၍ လူ ၁၁ ဦး ‌ေ-သဆုံးခဲ့သည်ဟု အာဏာပိုင်များက ပြောဆိုသည်။

ည ၁၁ နာရီခန့်တွင် လူများစွာ ပိတ်မိသွားခဲ့သည့် မီးလောင်မှုဖြစ်စဉ်နှင့်ပတ်သက်၍ အာဏာပိုင်များက မီးလောင်မှုကို စတင် ဖြစ်ပေါ်စေခဲ့သည့် သံသယရှိသူ အမျိုးသားတစ်ဦးကို ရဲတပ်ဖွဲ့က ဖမ်းဆီးထားသည်ဟု ပြည်သူ့လုံခြုံရေးဝန်ကြီးဌာနက ကြာသပတေးနေ့တွင် ပြောကြားခဲ့သည်။

“ကော်ဖီဆိုင်ကို ရည်ရွယ်ချက်ရှိရှိ နဲ့ မီးရှို့တာလို့ ရဲက သံသယရှိထားပြီး ကျူးလွန်သူကို ဖမ်းမိထားပါတယ်” ဟု ဟနွိုင်ရဲတပ်ဖွဲ့က ထုတ်ပြန်ပြောဆိုခဲ့သည်။

ရဲတပ်ဖွဲ့၏ အဆိုအရ အဆိုပါအမျိုးသားသည် အထပ်သုံးထပ် ပါသော ကော်ဖီဆိုင်၏ မြေညီထပ်တွင် ဓါတ်ဆီသုံးကာ မီးရှို့ခဲ့ခြင်းဖြစ်သည်ဟု ဝန်ခံခဲ့ကြောင်းနှင့် သူသည် ကော်ဖီဆိုင်ဝန်ထမ်းများနှင့် စကားများ ရန်ဖြစ်ခဲ့ပြီးနောက် ယင်းကဲ့သို့ လုပ်ခဲ့ခြင်းဖြစ်ကြောင်းထွက် ဆိုခဲ့သည်။

ကနဦးတွင် မီးရှိန်အလွန်ပြင်းထန်ကြောင်းနှင့် ကယ်ဆယ်မှုလုပ်ရမည့် အခြေအနေမျိုးဖြစ်ကြောင်း မျက်မြင်တွေ့ရှိသူများက ဒေသတွင်းမီဒီယာကို ပြောဆိုခဲ့သည်။

“ပိတ်မိနေတဲ့သူတွေအတွက် ကျွန်တော်တို့ အော်ဟစ်ပြောဆိုခဲ့ပေမယ့် အဆောက်အအုံထဲကနေ အကူအညီလှမ်းတောင်းတာမျိုးတော့ မကြားခဲ့ရပါဘူး” ဟု မျက်မြင်ကြုံတွေ့သူတစ်ဦးက ပြောသည်။

“မီးက ထွက်ပေါက်အားလုံးကို ပိတ်သွားစေခဲ့တယ်၊ ဓါတ်ဆီနံ့တွေ တော်တော်ထွက်တယ်” ဟုလည်း အခြားမျက်မြင်တွေ့ရှိသူတစ်ဦးက ပြောဆိုခဲ့သည်။

မီးလောင်မှုဖြစ်စဉ်တွင် လူ ၇ ဦးကိုကယ်ဆယ်ပေးခဲ့ပြီး ၎င်းတို့ထဲမှ နှစ်ဦးကို ဆေးရုံတင်ထားရသည်ဟု အာဏာပိုင်များက ပြောကြားခဲ့သည်။

Ref: ဒီဒဗ္ဗလျူ