နေပြည်တော်အပါအဝင် တိုင်းနှင့်ပြည်နယ်အချို့၌ ယနေ့မတ် ၂၈ ရက်မွန်းတည့်ပိုင်းက အင်အားပြင်း ထန်သည့် ငလျင်လှုပ်ခတ်ခဲ့သဖြင့် မန္တလေးမြို့၏ အထင်ကရဖြစ်သော မစိုးရိမ်ကျောင်းတိုက်မှ မစိုး ရိမ်တိုက်ဟောင်းပြိုကျပျက်စီးခဲ့ကြောင်း သိရသည်။
ထို့ပြင် မစိုးရိမ်ကျောင်းတိုက်တိုးချဲ့ဆောင်(၂)၏ စာသင်သားသံဃာတော်များ သီတင်းသုံးနေထိုင်တော်မူသည့် စာဖြေဆောင်ပြိုကျပျက်စီးကာ သံ ဃာတော်အချို့ထိခိုက်ဒဏ်ရာရရှိမှုများဖြစ်ပေါ်ခဲ့ကြောင်း သိရသည်။
ထို့အတူ အင်အားပြင်းငလျင်ဒဏ်ကြောင့် မန္တလေးမြို့ရှိ တောင်သမန်တိုက်သိမ်တော်နှင့် ပိဋကတ်ကျောင်းတို့တွင်လည်း ပြိုကျပျက်စီးမှုများဖြစ်ပေါ်ခဲ့ကြောင်း သိရသည်။
ထိုသို့ ပြိုကျပျက်စီးမှုများနှင့် လူများပိတ်မိနေမှုမရှိစေရန်၊ ပိတ်မိနေသူများရှိပါက ကယ်ဆယ်မှုများပြုလုပ်နိုင်ရန် လုံခြုံရေးအဖွဲ့ဝင်များ၊ ရဲတပ်ဖွဲ့ဝင်များ၊ တာဝန်ရှိသူများ၊ မီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များ၊ ကြက်ခြေနီတပ်ဖွဲ့ဝင်များ၊ လူမှုကူညီရေးအသင်းဝင်များနှင့် ဖြစ်စဥ်နေရာများအနီးနေသူများက ကူညီဖယ်ရှားရှင်းလင်းမှုများပြုလုပ်လျက်ရှိကြောင်း သိရသည်။