မန္တလေးတိုင်းဒေသကြီး၊ တံတားဦးမြို့နယ်၊ အင်းဝ-ပင်းယ ရှေးဟောင်းနယ်မြေအတွင်း ငလျင်ကြောင့် ပြိုကျပျက်စီးခဲ့သော ဘုရား၊ စေတီ၊ ပုထိုးများအနက် မူလစေတီကို ငုံ၍ တည်ခဲ့သော နှစ်ထပ်စေတီများ တွေ့ရှိခဲ့ကြောင်း ရှေးဟောင်း သုတေသနနှင့် အမျိုးသားပြတိုက်ဦးစီး ဌာန(မန္တလေးဌာနခွဲ)ထံမှ သိရသည်။
အဆိုပါ ရှေးဟောင်းနယ်မြေအတွင်း ငလျင်ကြောင့် ထိခိုက်ပျက်စီးမှုစာရင်းကောက်ယူစာရင်းပြုစုရာမှ ရှေးဟောင်းစေတီအချို့သည် နှစ်ထပ်စေတီဖြစ်နေသည်ကို တွေ့ရှိခဲ့ခြင်းဖြစ်သည်ဟုဆိုသည်။
ထို နှစ်ထပ်စေတီများမှာ သောတာပန်ဘုရားအနီးမှ အမှတ် (၉၃) စေတီတစ်ဆူ၊ဒေါ်ဂျမ်းဘုရားစုအတွင်း အမှတ် (၃၁၆) နှင့် (၃၁၈) စေတီ၊ အမှတ် (၂၁) ကြေးနီမုဌောစေတီ၊ မြသိန်းတန်ဘုရားအနီးမှ ကိုစံငွေယာခင်းအနီး (၁) ဆူ၊ မင်္ဂလာရပ်မှ ဦးထွန်းနိုင်ယာခင်းအနီး (၂) ဆူ၊ ရှင်ပင်ခရေသီးစေတီ၊ ပုလိပ်ဘုရားစု၊ အင်ရောင်ဘုရားစု စသည်တို့ ဖြစ်ဖြစ်ကြောင်းသိရသည်။
၂၀၂၅ ခုနှစ်၊ မတ် (၂၈) ရက်က အင်အား ရစ်(ခ်)တာစကေး ၇ ဒသမ ၇ အဆင့်ရှိငလျင် လှုပ်ရှားခဲ့ရာ မန္တလေး၊ အင်းဝ၊ အမရပူရမြို့နယ်တို့တွင် လူနေအိမ်များနှင့် ရှေးဟောင်းအဆောက်အအုံများ ပျက်စီးမှုရှိခဲ့ပြီး အင်းဝ-ပင်းယ ရှေးဟောင်းဇုန်တွင် မှတ်တမ်းတင်ထားသည့် ရှေးဟောင်းအဆာက်အအုံ (၉၆၀) ရှိရာ (၇၀) ရာနှုန်းခန့် ပျက်စီးခဲ့ကြောင်းသိရသည်။