ရီယာဒ်၊ဇွန် ၂၀
ယခုနှစ်တွင် ဆော်ဒီအာရေဗျသို့ ဟာ့ဂ်ျဘုရားဖူးလာသူများအနက် အပူဒဏ်ကြောင့် ေ-သဆုံးသူသည် ထောင်ကျော်အထိ ဖြစ်လာကြောင်း အာဏာပိုင်များကထုတ်ပြန်ကြေငြာခဲ့သည်။
ကြာသပတေးနေ့အထိ ေ-သဆုံးသူများထဲတွင် အီဂျစ်နိုင်ငံမှ ၅၈ ဦးပါဝင်ကြောင်းသိရသည်။ ယခုနှစ် ဟာ့ဂ်ျ ဘုရားဖူးကာလအတွင်း အပူဒဏ်ကြောင့် နိုင်ငံပေါင်း ၁၀ နိုင်ငံမှ ေ-သဆုံးသူသည် စုစုပေါင်း ၁,၀၈၁ ဦးအထိရှိလာပြီဖြစ်ကြောင်းဖော်ပြထားသည်။
ေ-သဆုံးမှုပမာဏကိန်းဂဏန်းများသည် တရားဝင်ထုတ်ပြန်ချက်များ သို့မဟုတ် သက်ဆိုင်ရာနိုင်ငံများမှ တာဝန်ထမ်းဆောင်နေသည့် သံတမန်များထံမှထွက်ပေါ်လာခြင်းဖြစ်သည်။
ဆော်ဒီ နိုင်ငံ မိုးလေဝသဌာနက ယခုသီတင်းပတ်အစောပိုင်း၌ မက္ကာမြို့ရှိ Grand Mosque တွင် အပူချိန် ၅၁ ဒသမ ၈ ဒီဂရီစင်တီဂရိတ်အထိမြင့်တက်ခဲ့သည်။
ပြီးခဲ့သည့်လကထုတ်ပြန်ခဲ့သည့် သတင်းတစ်ခုတွင် အဆိုပါဒေသရှိအပူချိန်သည် ဆယ်စုနှစ်တစ်ခုလျှင် ၀ ဒသမ ၄ ဒီဂရီစင်တီဂရိတ်အထိမြင့်တက်လျက်ရှိသည်ဟုဖော်ပြထားသည်။
မွတ်ဆလင်ဘာသာဝင်များအထွဋ်အမြတ်ထားရာ မက္ကာ သို့ ဘုရားဖူးသွားရန်ကုန်ကျစရိတ်မှာ ကြီးမားသည့်အတွက် အများစုက တရားမဝင် သောနည်းလမ်းများဖြင့် ဝင်ရောက်ဖူးမြော်ရာမှ တရားဝင်ဘုရားဖူးများအတွက် ဆော်ဒီအစိုးရစီစဉ်ထားသည့် လေအေးပေးစက်နှင့်သက်သောင့်သက်သာနေရာထိုင်ခင်းမရသည့်အတွက် ယခုကဲ့သို့သော အဖြစ်မျိုး ကြုံကြရခြင်းဖြစ်သည်။
ေ-သဆုံးသူများထဲတွင် အီဂျစ်အပြင် မလေးရှား၊ပါကစ္စတန်၊အိန္ဒိယ၊ဂျော်ဒန်၊အင်ဒိုနီးရှား၊အီရန်၊ဆီနီဂေါ၊တူနီးရှားနှင့် အီရတ်၏ကိုယ်ပိုင်အုပ်ချုပ်ခွင့်ရဒေသ ကာဒီစတန်မှ ဘုရားဖူးများပါဝင်သည်ဟုသိရှိရသည်။
Source : အေအက်ဖ်ပီ/အာရ်ကေ