အမေရိကတွင် မုန်တိုင်းနှင့် ရေကြီးမှုများကြောင့် သေဆုံးသူ ၁၇ ဦး ရှိလာ

အမေရိကန်ပြည်ထောင်စု အရှေ့အလယ်ပိုင်းတွင် ပြင်းထန်သော မုန်တိုင်းများဝင်ရောက်တိုက်ခတ်မှုကြောင့် လူ ၁၇ ဦးထက်မနည်း သေဆုံးခဲ့ကြောင်း တာဝန်ရှိသူများက တနင်္ဂနွေနေ့တွင် ပြောကြားခဲ့ပြီး ရုတ်တရက် ရေလွှမ်းမိုးမှု ဆိုးရွားစွာဖြစ်နိုင်သည်ဟု နိုင်ငံတော်မိုးလေဝသဌာနက သတိပေးခဲ့သည်။

ကန်တပ်ကီ၊ တင်နက်စီနှင့် အလာဘားမားပြည်နယ်တို့တွင် ရေလွှမ်းမှု သတိပေးချက်သည် အသက်ဝင်နေဆဲဖြစ်သည်ဟု မိုးလေဝသခန့်မှန်းသူများက ပြောဆိုသည်။

တင်နက်စီပြည်နယ်သည် သဘာဝဘေးဒဏ်ကို အဆိုးဝါးဆုံးခံခဲ့ရပြီး ပြည်နယ်အနောက်ပိုင်းတွင် သေဆုံးသူ ၁၀ ဦးအထိ ရှိခဲ့သည်။ ကန်တပ်ကီ၊ မစ်ဆူရီပြည်နယ်များတွင် နှစ်ဦးစီသေဆုံးခဲ့ပြီး အာကန်‌ဆော၊ အင်ဒီယားနားနှင့် မစ္စစ္စပီပြည်နယ်များတွင် တစ်ဦးစီ သေဆုံးခဲ့ကာ သေဆုံးဦးရေ ထပ်မြင့်တက်နိုင်သေးသည်ဟု ဆိုသည်။

ကန်တပ်ကီပြည်နယ် ဂျက်ဖာဆင်တောင်းတွင် လေဆင်နှာမောင်းတိုက်ခတ်မှုကြောင့် အဆောက်အအုံများ ပျက်စီးခဲ့သည်ဟု အေအက်ဖ်ပီ သတင်းထောက်တစ်ဦးက ပြောဆိုသည်။

လူမှုကွန်ရက်နှင့် ဒေသတွင်းမီဒီယာများက ဖော်ပြခဲ့သော ဓါတ်ပုံများတွင် မုန်တိုင်းကြောင့် ပြည်နယ်အများအပြားတွင် ပျက်စီးမှုအနှံ့အပြားဖြစ်နေခဲ့သည်ကို တွေ့ရပြီး၊ နေအိမ်များပြိုကျခြင်း၊ သစ်ပင်များ ပြိုလဲခြင်း၊ ဓါတ်အားလိုင်းများ လဲကျခြင်းနှင့် ကားများတိမ်းမှောက်ခြင်းတို့ ပါဝင်သည်။

နိုင်ငံအရှေ့တောင်ပိုင်းနှင့် ပင်လယ်ကွေ့ကမ်းရိုးတန်း အစိတ်အပိုင်းများတွင် ညနေပိုင်းနှင့် ညသန်းခေါင်ကျော်ချိန်အထိ မိုးကြီးမှုနှင့် ရုတ်တရက် ရေကြီးမှုများဖြစ်နိုင်ခြေရှိနေဆဲဟု နိုင်ငံတော်မိုးလေဝသဌာနက တနင်္ဂနွေနေ့တွင် ပြောကြားခဲ့သည်။

Ref: ဘန်ကောက်ပို့စ်