အီးယူထိပ်သီး အစည်းအဝေးတက်‌ေရာက်ရန် ဖိတ်ကြားမှု ရှီ ငြင်းဆို

အီးယူ-တရုတ် သံတမန်ဆက်ဆံရေး နှစ် ၅၀ ပြည့်အထိမ်းအမှတ် ထိပ်သီးအစည်းအဝေးသို့ တက်ရောက်ရန်အတွက် ဘရပ်ဆဲလ်သို့ လာရောက်ရန် ဖိတ်ကြားမှုကို တရုတ်သမ္မတ ရှီကျင့်ဖျင်က ငြင်းဆိုခဲ့သည်ဟု Financial Times သတင်းစာက တနင်္ဂနွေနေ့တွင် ဖော်ပြခဲ့သည်။

ရှီအစား ဝန်ကြီးချုပ် Li Qiang သည် ဥရောပကောင်စီနှင့် ကော်မရှင်ဥက္ကဌများကို တွေ့ဆုံသွားမည်ဖြစ်ကြောင်း ပေကျင်းက အီးယူအရာရှိများကို ပြောဆိုခဲ့သည်ဟု ယင်းကိစ္စနှင့် နီးစပ်သော အမည်မဖော်လိုသည့် သတင်းရင်းမြစ်နှစ်ခုကို ကိုးကား၍ FT က ဆိုသည်။

ဘရပ်ဆဲလ်တွင် ကျင်းပသည့် အဆိုပါ ထိပ်သီးအစည်းအဝေးများကို တရုတ်ဝန်ကြီးချုပ်ကသာ များသောအားဖြင့် တက်ရောက်လေ့ရှိပြီး ပေကျင်းတွင် လက်ခံကျင်းပသည့် အစည်းအဝေးကိုသာ သမ္မတက တက်ရောက်လေ့ရှိသည်။ သို့ရာတွင် ပေကျင်းနှင့် အီးယူအကြား ရာစုနှစ်ဝက်ကြာ ဆက်ဆံရေးအထိမ်းအမှတ် အစည်းအဝေးကိုမူ အီးယူက ရှီကို တက်ရောက်စေလိုခဲ့သည်ဟု သတင်းစာက ဆိုသည်။

၂၀၂၂ ခုနှစ်တွင် ရုရှားက ယူကရိန်းကို ကျူးကျော်ခဲ့ပြီးနောက်မှစကာ ဘရပ်ဆဲလ်နှင့် ပေကျင်းအကြား ဆက်ဆံရေး တင်းမာမှု ကြီးထွားခဲ့ပြီး တရုတ်နိုင်ငံသည် ခရမ္မလင်ကို ကျောထောက်နောက်ခံပေးနေသည်ဟု အီးယူက စွပ်စွဲခဲ့သည်။ ပြီးခဲ့သည့်နှစ်တွင်လည်း ဥရောပသမဂ္ဂသည် တရုတ် လျှပ်စစ်ကား တင်သွင်းမှုများအပေါ် အခွန်စည်းကြပ်ခဲ့သည်။

“ဒီနှစ် အီးယူ-တရုတ် ထိပ်သီးအစည်းအဝေး ကျင်းပမယ့်ရက်နဲ့ ကိုယ်စားပြုအဆင့်ဆိုင်ရာအတွက် အလွတ်သဘောဆွေးနွေးမှုတွေ ဆက်လက်လုပ်ဆောင်နေပါတယ်” ဟု အီးယူအရာရှိတစ်ဦးက သတင်းစာကို ပြောဆိုခဲ့ပြီး ယင်းကိစ္စအတွက် ပြောစရာမရှိပါကြောင်း တရုတ်ဝန်ကြီးဌာနက ပြောကြားသည်ဟု ဆိုခဲ့သည်။

Ref: သည်စထရိတ်တိုင်းမ်စ်