ဘင်္ဂလားပင်လယ်အော်တောင်ပိုင်း၌ ဧပြီ လဆန်း(၄)ရက်ဝန်းကျင် လေဖိအားနည်းရပ်ဝန်းဖြစ်နိုင်ချေရှိပြီး ဧပြီ (၇) ရက် နောက်ပိုင်းရက်များတွင် တိုင်းနှင့်ပြည်နယ် အနှံ့ မိုးအနည်းငယ်မှ အသင့်အတင့် ရွာသွန်းနိုင်မည် ဖြစ်ကြောင်း ပြင်ပ မိုးလေဝသပညာရှင် ဦးဝင်းနိုင်၏ ခန့်မှန်းရေးသားချက်အရ သိရသည်။
၂၀၂၅ ခုနှစ်၊ ဧပြီ (၄) ရက် နေလည်ပိုင်းမှ စတင်၍ ဘင်္ဂလားပင်လယ်အော်တောင်ပိုင်း၌ လေဖိအားနည်းရပ်ဝန်း တစ်ခုဖြစ်ပေါ်လာနိုင်ကြောင်းနှင့် အချက်အလက်များအရ လမ်းကြောင်းနှင့် အင်အားကြိုတင်ခန့်မှန်းချက်များ တည်ငြိမ်မှု မရှိသေးကြောင်းလည်း ၎င်းက ခန့်မှန်းထားသည်။
အဆိုပါ အခြေအနေများအရ မုန်တိုင်းဖြစ်၊ မဖြစ်နှင့် ဆက်လက်ရွေ့လျားနိုင်မည့် လမ်းကြောင်းမှာ မြန်မာနိုင်ငံအပေါ် သက်ရောက်မှု ရှိ၊ မရှိနှင့် သက်ရောက်မှု များနိုင်/မများနိုင် အတိအကျ ခန့်မှန်းနိုင်ခြင်း မရှိသေးကြောင်းလည်း ဦးဝင်းနိုင်က ဆိုသည်။
ထို့ကြောင့် လက်ရှိ ငလျင်ဒဏ်ခံဒေသများမှ ကူညီကယ်ဆယ်ရေးလုပ်ဆောင်နေသည့် ကယ်ဆယ်ရေးအဖွဲ့များနှင့် အိုးအိမ်စွန့်လွှတ်လိုက်ရသည့် ငလျင်ဒဏ်သင့်ပြည်သူများအနေဖြင့်လည်း ဧပြီလဆန်းပိုင်းမှ စတင်၍ မိုးလေဝသဖြစ်နိုင်ချေများကို စဉ်ဆက်မပြတ်နားစွင့်ကြရန်လည်း ဦးဝင်းနိုင်က အသိပေးတင်ပြထားသည်။