၁၂ ကြိမ်မြောက်အာရှနိုင်ငံရေးပါတီများအစည်းအဝေး ကမ္ဘောဒီးယား၌ကျင်းပ

ဖနောင်ပင်၊နိုဝင်ဘာ ၂၃

ကမ္ဘောဒီးယားနိုင်ငံသည် အာရှနိုင်ငံရေးပါတီများညီလာခံ (ICAPP) ၏ ၁၂ ကြိမ်မြောက် အထွေထွေညီလာခံကို “ငြိမ်းချမ်းရေးနှင့် ပြန်လည်သင့်မြတ်ရေး ရှာဖွေခြင်း” ဟူသောဆောင်ပုဒ်ဖြင့် အိမ်ရှင်အဖြစ် လက်ခံကျင်းပခဲ့သည်။

လေးရက်ကြာကျင်းပပြုလုပ်သည့်အဆိုပါအစည်းဝေးပွဲသို့ နိုင်ငံပေါင်း ၄၂ နိုင်ငံရှိ နိုင်ငံရေးပါတီ ၅၇ ပါတီမှ ကိုယ်စားလှယ် ၂၀၀ ကျော်တက်ရောက်ခဲ့ရာ မြန်မာနိုင်ငံမှ ပြည်ထောင်စုကြံ့ခိုင်ရေးနှင့်ဖွံဖြိုးရေးပါတီမှ ဥက္ကဌဦးခင်ရီအပါအဝင် ကိုယ်စားလှယ် လေးဦးတက်ရောက်ခဲ့သည်။

အဆိုပါ အထွေထွေညီလာခံကို ဒေသတွင်းနှင့် ကမ္ဘာလုံးဆိုင်ရာစိန်ခေါ်မှုများကိုဖြေရှင်းရန် အာရှနိုင်ငံရေးပါတီများအကြား ဆွေးနွေးမှုနှင့် ပူးပေါင်းဆောင်ရွက်မှုကို မြှင့်တင်ရန် ရည်ရွယ်လျှက် အိမ်ရှင်နိုင်ငံဖြစ်သည့် ကမ္ဘောဒီးယားတော်ဝင်အစိုးရသည် ငြိမ်းချမ်းရေးနှင့်ပြန်လည်သင့်မြတ်ရေးဆိုင်ရာ ကတိကဝတ်များကိုလည်းအလေးအနက်ပြုပြောကြားခဲ့သည်။

ဆယ်စုနှစ်များစွာကြာခဲ့သည့် ပဋိပက္ခများအပြီး ငြိမ်းချမ်းရေးနှင့်တည်ငြိမ်ရေးဆီသို့ ဦးတည်နိုင်ခဲ့သည့် ကမ္ဘောဒီးယား၏အတွေ့အကြုံသည် ဒေသတွင်းရှိအခြားနိုင်ငံများအတွက်ပါ အဖိုးတန်သင်ခန်းစာတစ်ခုဖြစ်သည်ဟုဆိုသည်။

နိုဝင်ဘာ ၂၄ ရက်အထိကျင်းပခဲ့သည့် ၁၂ ကြိမ်မြောက် အာရှနိုင်ငံရေးပါတီများ အထွေထွေညီလာခံတွင် ဒေသတွင်း လုံခြုံရေး၊စီးပွားရေးပူးပေါင်းဆောင်ရွက်မှုနှင့် ယဉ်ကျေးမှုဖလှယ်ရေးအပါအဝင် ကဏ္ဍအသီးသီးတွင် ဆွေးနွေးမှုများနှင့်အလုပ်ရုံဆွေးနွေးပွဲများလည်းပါဝင်ခဲ့သည်။

ကမ္ဘောဒီးယားသည် အထွေထွေညီလာခံ၏ပြင်ပတွင် ဆက်စပ် အစည်းအဝေးများအဖြစ်အာရှယဉ်ကျေးမှုကောင်စီ (ACC) ၏ တတိယအကြိမ်အစည်းအဝေး နှင့် သတ္တမ အကြိမ်မြောက် ICAPP မီဒီယာဖိုရမ် တို့ကိုပါ လက်ခံကျင်းပခဲ့သည်။ မီဒီယာဖိုရမ်သို့ ဂလိုဘယ်နူးလိုက်အော့ဖ်မြန်မာ အယ်ဒီတာချုပ်ဟောင်း ဦးခင်မောင်အေးသည် ပေါ်ပြူလာနူးစ်ကို ကိုယ်စားပြု၍ ပါဝင်တက်ရောက် ဆွေးနွေးခဲ့သည်။

ICAPP ကို ဒေသတွင်းပူးပေါင်းဆောင်ရွက်မှု၊ ငြိမ်းချမ်းရေးနှင့်သာယာဝပြောရေးများကိုမြှင့်တင်မည့် ဆွေးနွေးပွဲများပြုလုပ်ရန်အတွက် အာရှ၊အရှေ့အလယ်ပိုင်းနှင့် သမုဒ္ဒရာတစ်ဝန်းနိုင်ငံများ မှ နိုင်ငံရေးပါတီများစုစည်းကာ ၂၀၀၀ ပြည့်နှစ်တွင် စတင်တည်ထောင်ခဲ့ခြင်းဖြစ်သည်။

၎င်းသည် နိုင်ငံပေါင်း ၅၂ မှ အဖွဲ့ဝင် ၃၅၀ ကျော်ဖြင့် ဖွဲ့စည်းထားသည့် အာရှ၏အကြီးဆုံးနိုင်ငံရေးပါတီကွန်ရက်တစ်ခုလည်းဖြစ်သည်။ ၁၃ ကြိမ်မြောက် အထွေထွေညီလာခံကို တောင်ကိုရီးယား နိုင်ငံ က ဆိုးလ်မြို့တွင် အိမ်ရှင် နိုင်ငံအဖြစ် လက်ခံ ကျင်းပသွားမည် ဖြစ်သည်။

Source : ပေါ်ပြူလာနူးစ်
ပုံစာ -ကမ္ဘောဒီးယားပြည်သူ့ပါတီဥက္ကဌမစ္စတာဟွန်ဆန် နှင့် မြန်မာ ကိုယ်စားလှယ်အဖွဲ့ တွေ့ဆုံစဉ်။