ယမန်နေ့ ဇန်နဝါရီ (၁၈)ရက် မွန်းလွဲပိုင်းအချိန်က မြိတ်မြို့ ၊ ရှမ်းချောင်းလမ်းမကြီး၊ တိုင်းရုံးလမ်းခွဲအနီး လောင်ကျွမ်းခဲ့သည့် “ဖိုးလမင်း” အမည်ရှိ ရာဘာအထပ်သားစက်ရုံ မီးလောင်မှုတွင် ဆုံးရှုံးမှုတန်ဖိုး သိန်းပေါင်းသောင်းချီရှိနိုင်သည်ဟု မြေပြင်ကူညီဆောင်ရွက်ခဲ့သူသတင်းရင်းမြစ်တစ်ဦးကပြောသည်။
ယင်း မီးလောင်ကျွမ်းမှုအား မီးထိန်းချိန် (၂)နာရီကျော်ကြာမြင့်ခဲ့ပြီး အပြီးသတ် မီးငြိမ်းနိုင်ချိန်ဖြင့်ဆိုပါက (၄)နာရီကျော်ကြာ မြင့်ခဲ့ကြောင်း ၎င်းက ဆိုသည်။
“ဝါယာရှော့လို့ သတ်မှတ်ပါတယ်။ ရာဘာ အထပ်သားစက်ရုံ ဂိုထောင်တွေပါ။ အဲဒီထဲမှာမှ အကြီးဆုံးလို့ ဆိုနိုင်တဲ့ ဂိုထောင်က လောင်တာပါ။ လူထိခိုက်ေ-သဆုံးမှုမရှိပါဘူး။ မီးသတ်ဦးစီးကတော့ စစ်ဆေးမှုတွေ ဆက်လက်ဆောင်ရွက်နေပါတယ်” ဟု ၎င်းက ရှင်းပြသည်။
ယမန်နေ့က မြိတ်မြို့တွင် အဆိုပါ ရာဘာအထပ်သားစက်ရုံဂိုထောင် မီးလောင်ကျွမ်းမှုအပါအဝင် တစ်ရက်တည်း မီး (၂) ကြိမ်လောင်ကျွမ်းခဲ့ပြီး နံနက် အစောပိုင်း (၃)နာရီအချိန်က မြိတ်မြို့ အလယ်ကျွန်းရပ်ကွက်တွင်လည်း မီးလောင်ကျွမ်းခဲ့ရာ လူနေအိမ်တစ်လုံးနှင့် နှစ်ခန်းတွဲနေအိမ်တစ်လုံး မီးသင့်ဆုံးရှုံးခဲ့ပြီး အမျိုးသားတစ်ဦး ေ-သဆုံးခဲ့ ကြောင်း သိရသည်။
ဓာတ်ပုံ-ရှင်သန်ခြင်း ပရဟိတ အသင်း