ယခု ၂၀၂၄ – ၂၀၂၅ ဘဏ္ဍာနှစ် ဧပြီလမှ နိုဝင်ဘာလအထိ (၈) လတာကာလအတွင်း ပုဂ္ဂလိကကဏ္ဍမှ ပြည်ပသို့ ပျားရည်တင်ပို့မှုအနေဖြင့် မက်ထရစ်တန် (၉၀၈ ဒသမ ၄၈) တန် တင်ပို့ခဲ့ကြောင်း မွေးမြူရေးနှင့်ကုသရေးဦးစီးဌာန၊ ပျားလုပ်ငန်းဌာန(ပျားမွေးမြူမှုဖွံ့ဖြိုးရေးဌာနခွဲ)မှ သိရသည်။
ပျားရည်တင်ပို့မှုအနေဖြင့် ဂျပန်နိုင်ငံသို့ (၇၂ ဒသမ ၅) ရာခိုင်နှုန်း၊ ထိုင်းနိုင်ငံသို့ (၂၂ ဒသမ ၁၈) ရာခိုင်နှုန်းနှင့် တရုတ်နိုင်ငံသို့ (၅) ရာခိုင်နှုန်း အသီးသီး တင်ပို့ထားကြောင်း သိရသည်။
မြန်မာ့ပျားရည်ကို ပြည်ပသို့တင်ပို့ရာတွင် ဂျပန်၊ တောင်ကိုရီးယား၊ ထိုင်း၊ တရုတ်နှင့် တရုတ်(တိုင်ပေ)စတဲ့ နိုင်ငံများထံ တင်ပို့လျက်ရှိပြီး ပုံမှန်ကုန်သွယ်ရေးလမ်းကြောင်းမှ မက်ထ ရစ်တန် (၈၆၀ ဒသမ ၆၈) တန်နှင့် နယ်စပ်ကုန်သွယ်ရေးမှ မက်ထရစ်တန် (၄၇ ဒသမ ၈) တန်၊ စုစုပေါင်း မက်ထရစ်တန် (၉၀၈ ဒသမ ၄၈) တန် တင်ပို့ခဲ့ပြီး ယင်းတင်ပို့မှုမှ အမေရိကန်ဒေါ်လာ (၁ ဒသမ ၃၆၃) သန်း ရရှိခဲ့ကြောင်း သိရသည်။
ဂျပန်နိုင်ငံသို့ မက်ထရစ်တန် (၆၅၈ ဒသမ ၆၆) တန်ဖြင့် အများဆုံးတင်ပို့ခဲ့ပြီး ထိုင်းနိုင်ငံသို့ မက်ထရစ်တန် (၂၀၁ ဒ သမ ၅၁) တန်၊ တရုတ်နိုင်ငံသို့ မက်ထရစ်တန် (၄၅ ဒသမ ၈) တန်၊ တရုတ်(တိုင်ပေ) သို့ မက်ထရစ်တန် (၂) တန်နှင့် တောင်ကိုရီးယားနိုင်ငံသို့ (၀ ဒသမ ၅) မက်ထရစ်တန် တင်ပို့ထားခြင်းဖြစ်ကြောင်း သိရသည်။
ပြည်တွင်း၌ထုတ်လုပ်လျက်ရှိသည့် ပျားရည်အမျိုးအစားများမှာ နှမ်းပျားရည်၊ ဆီးပျားရည်၊ ပန်းနှမ်းပျားရည်၊ နေကြာပျားရည်၊ ရော်ဘာပျားရည်နှင့် လိုက်ချီးပျားရည် တို့ကို ထုတ်လုပ်လျက်ရှိပြီး ပျားရည်ကို ပြည်တွင်း၌ ဆေးဝါး အဖြစ်သာ အသုံးပြုမှုများကြောင်း သိရသည်။