Category: Movies

ဆိုးလ်နှင့် ဝါရှင်တန်တို့၏ နှစ်ပတ်လည် ပူးတွဲစစ်ရေးလေ့ကျင့်မှု Freedom Shield ကို စတင်သည့်နေ့မှာပင် မြောက်ကိုရီးယားသည် အမျိုးအမည်မသိ ပဲ့ထိန်းဒုံးကျည် အမြောက်အများကို ပစ်လွှတ်ခဲ့သည်ဟု တောင်ကိုရီးယားစစ်တပ်က ပြောကြားခဲ့သည်။ “ဒေသစံတော်ချိန် ၁၃း၅၀ နာရီဝန်းကျင်တွင် Hwanghae ပြည်နယ်မှ အနောက်ပင်လယ်ဆီသို့ အမျိုးအမည်မသိ ပဲ့ထိန်းဒုံးကျည် အမြောက်အများ ပစ်လွှတ်ခဲ့သည်ကို မိမိတို့ စစ်တပ်က ထောက်လှမ်းတွေ့ရှိခဲ့သည်” ပူးတွဲစစ်ဦးစီးချုပ်များရုံး(JCS) က ပင်လယ်ဝါဟုလည်း သိကြသည့် ရေပြင်နယ်မြေကို ရည်ညွှန်း ပြောဆိုခဲ့သည်။ အမေရိကန်ပြည်ထောင်စုနှင့် အနီးကပ်ပူးပေါင်းဆောင်ရွက်မှုအားဖြင့် မိမိတို့စစ်တပ်သည် စောင့်ကြည့်ထောက်လှမ်းမှုကို အားကောင်းအောင်လုပ်ဆောင်၍ အပြည့်အ၀ အသင့်အနေအထားရှိမှုကို ဆက်လက်ထားရှိသွားမည်ဖြစ်ကြောင်းလည်း JCS က ပြောဆိုခဲ့သည်။ အမေရိကန်ပြည်ထောင်စုသည် တောင်ကိုရီးယားတွင် အမေရိကန်စစ်သားများကိုသောင်းနှင့်ချီ၍ ချထားပြီး မဟာမိတ်များအနေဖြင့် ကာကွယ်ရေးရည်ရွယ်ချက်အတွက်ဆိုသော ပူးတွဲစစ်ရေးလေ့ကျင့်မှုများကို ပုံမှန်ဆောင်ရွက်လေ့ရှိသည်။ သို့သော်လည်း ကျူးကျော်ရေးအတွက် ဇာတ်တိုက်လေ့ကျင့်ခြင်းဖြစ်သည်ဟု မှတ်ယူသော အဆိုပါစစ်ရေးလေ့ကျင့်မှုများသည် ပြုံယမ်းကို ဒေါသထွက်စေပြီး လက်နက်စမ်းသပ်ခြင်းများဖြင့် ပုံမှန်လိုပင် တုန့်ပြန်လေ့ရှိသည်။ နျူကလီးယားလက်နက်ပိုင် မြောက်ကိုရီးယားက စစ်ရေးလေ့ကျင့်မှုကို ရန်စသည့်လုပ်ရပ်ဟု တနင်္လာနေ့အစောပိုင်းတွင် ပြောဆိုခဲ့ပြီး မတော်တဆ ပ-စ်ခတ်မိမှုမှ စစ်ဖြစ်သွားနိုင်သည့် အန္တရာယ်အတွက် သတိပေးခဲ့သည်။ Ref: ဖရန့်24