ထိုင်းနိုင်ငံရှိ အစ္စရေးနိုင်ငံသားအနေဖြင့် လာမည့်သောကြာနေ့တွင် ကျရောက်မည့် ကော့ဖငံ လပြည့်ပွဲတော်ကာလအတွင်း ပစ်မှတ်ထားခံရနိုင်သည့် သတင်းများထွက်ပေါ်နေမှုကြောင့် သတိရှိရှိ နေထိုင်ကြရန် အစ္စရေးအာဏာပိုင်များက အကြံပြုခဲ့သည်ဟု တိုင်မ်းစ် အော့ဖ်ဖ့်အစ္စရေး သတင်းဌာနက သတင်းဖော်ပြသည်။ နိုင်ငံတွင်းရှိ အစ္စရေးနိုင်ငံသားများကို အကြမ်းဖက်တိုက်ခိုက်နိုင်သည့် အကြံအစည်အတွက် စိုးရိမ်ရသည်ဟု ထိုင်းရဲတပ်ဖွဲ့၏ ဌာနတွင်း သတိပေး စာရွက်စာတမ်းများ အစီရင်ခံချက်ထွက်ပေါ်လာပြီးနောက် မော့ဆက်နှင့် အမျိုးသားလုံခြုံရေးကောင်စီတို့က သတိပေးချက်ထုတ်ပြန်ခဲ့ခြင်းဖြစ်သည်။ အထူးအားဖြင့် နာမည်ကျော်ကြားသော လအလိုက်ပွဲတော်တစ်ခုဖြစ်သည့် လပြည့်ပွဲတော်အခမ်းအနားကို အဓိက သတိပေးခြင်းဖြစ်သည်ဟု ဟီဘရူးဘာသာစကားသုံးသတင်းစာ Yedioth Ahronoth ၏ အွန်လိုင်းဌာန Ynet ပြောကြားခဲ့သည်။ ကော့ဖငံနှင့် ယင်း၏ ပွဲအခမ်းအနားများသည် အစ္စရေးလူငယ်များအကြား အလွန်ရေပန်းစားသည်။ Ynet ၏ အဆိုအရ ခိုင်မာသော သတင်းအချက်အလက်များကို အခြေခံသည့် သတိပေးချက်များနှင့် ပတ်သက်၍ ထိုင်းရဲများသည် မကြာသေးမီရက်များအတွင်း ပြင်းထန်သော စစ်ဆင်ရေးများ ကိုလုပ်ဆောင်နေခဲ့သည်ဟု သိရသည်။ အစီရင်ခံချက်ကို အရေးယူ ဆောင်ရွက်သည့်အနေဖြင့် အစ္စရေးလုံခြုံရေးဌာနများသည် ထိုင်းလုံခြုံရေးအဖွဲ့နှင့် ပူးပေါင်း၍ နိုင်ငံအတွင်း ဖြစ်ရပ်များကို ဟန့်တားရန် ဆောင်ရွက်ခဲ့သည်ဟု မော့ဆက်နှင့် အမျိုးသားလုံခြုံရေးကောင်စီတို့က ပြောဆိုခဲ့သည်။ အောက်တိုဘာ ၇ ရက်နှင့် ဂါဇာစစ်ပွဲနောက်ပိုင်းမှစ၍ အီရန်နှင့် ၎င်း၏ လက်ဝေခံများသည် ကမ္ဘာတစ်ဝန်းရှိ အစ္စရေးနှင့် ဂျူး ပစ်မှတ်များကို အန္တရာယ်ပြုရန်ကြိုးပမ်းမှု အရှိန်မြင့်လာခဲ့သည်ဟု ယင်းအဖွဲ့များက ပြောဆိုသည်။ Ref: ဘန်ကောက်ပို့စ်