ဘန်ကောက်၊ ဇန်နဝါရီ ၂၃
တရုတ်နှစ်သစ်ကူး အားလပ်ရပ်ကာလအတွင်း ထိုင်းနိုင်ငံအလယ်ပိုင်းတွင် ခရီးသည်တင် ဗင်ကားတစ်စီး တိမ်းမှောက်မှုကြောင့် ကလေးငယ်နှစ်ဦး အပါအဝင် လူ ၁၁ ဦး သေဆုံးခဲ့ကြောင်း ရဲတပ်ဖွဲ့က ဇန်နဝါရီလ ၂၃ ရက် တနင်္လာနေ့တွင် ပြောကြားခဲ့သည်။
လူ ၁၂ ဦးအား တင်ဆောင်လာခဲ့သော အဆိုပါ ဗင်ကားသည် စနေနေ့ညတွင် အရှေ့မြောက်ပိုင်း အမ်နက် ချရွန် ပြည်နယ်မှ ဘန်ကောက်မြို့ကို ထွက်ခွာလာစဉ် နက်ခွန် ရာချက်စီမာ ပြည်နယ် အလယ်ပိုင်းရှိ အဝေးပြေးလမ်းမပေါ်သို့ ရောက်သောအခါ လမ်းလယ်ကျွန်း ကို ဝင်တိုက်၍ တိမ်းမှောက်သွားခဲ့ခြင်း ဖြစ်ကြောင်း ရဲမှူးကြီး ယင်ရော့ ပလောရီက ပြောသည်။
ထိုလူ ၁၂ ဦးထဲမှ တစ်ဦးမှာ ပြတင်းပေါက်မှ တွားသွားလွတ်မြောက်လာခဲ့သော်လည်း အခြားခရီးသည်များမှာမူ ကားထဲပိတ်မိကာ မီးလောင်သေဆုံးသွားခဲ့ကြောင်း ယင်ရော့က အေအက်ဖ်ပီ သတင်းဌာနသို့ ပြောကြားခဲ့သည်။
အသက်ရှင်လွတ်မြောက်လာသူ ၂၂ နှစ်အရွယ် ကျောင်းသား တာနချစ် ကင်ကာဝူ က တစ်စုံတစ်ယောက်၏ အော်သံကို ကြားပြီးနောက် တစ်ခုခုနှင့် ဆောင့်မိသလိုဖြစ်ကာ အိပ်ပျော်ရာမှ လန့်နိုးလာခဲ့သည်ဟု ဆိုသည်။
“ကျွန်တော် နိုးလာပြီးနောက် သတိထားမိတာတစ်ခုက ဗင်ကားက စောက်ထိုးဖြစ်နေပြီ ဆိုတာပါပဲ၊ ဘယ်လိုဖြစ်သွားလဲဆိုတာ မသိလိုက်ရပါဘူး၊ ကားမှောက်ပြီးတဲ့နောက် ကားနောက်ဘက်ကနေ မီးစလောင်လာပါတယ်၊ ကျွန်တော် ပြတင်းပေါက်တွေကို ကန်ခဲ့ပြီး ကွဲသွားတဲ့ အပေါက်သေးသေးလေးကနေ တွားသွား လွတ်မြောက်လာခဲ့တာပါ၊ ကျွန်တော် ထွက်လာပြီး မကြာခင်မှာပဲ ကားကပေါက်ကွဲသွားပါတယ်” ဟု သူက ဆိုသည်။
စက္ကန့် သုံးဆယ်အတွင်း ကားတစ်စီးလုံး မီးစွဲသွားကြောင်းနှင့် လက်ထဲရှိ မီးသတ်ဆေးဘူးဖြင့် ဖြန်းခဲ့သော်လည်း အရာမထင်ခဲ့ကြောင်း တာနချစ်က ပြောကြားခဲ့သည်။
Source: CNA
