နေပြည်တော်၊ ရာဇဌာနီလမ်းရှိ လက်လုပ်တောင်သာသနာပြုကုန်းမြေ၏ ဓမ္မမဏ္ဍိုင်စံကျောင်းတော်၌ ကြေးအစစ်ဖြင့်သွန်းလောင်းထားသည့် မဟာဗောဓိမြိုင်ဆရာတော်ကြီး၏ ပုံတူကြေးရုပ်ထုတော်အား ပူဇော်ထားရှိသည်။
မဟာဗောဓိမြိုင်ဆရာတော်ကြီး၏ ပုံတူကြေးရုပ်ထုတော်သည် အမြင့် ၄၂ လက်မရှိကာ ကြေးအစစ်ပိဿာချိန် ၈၀ ဖြင့် မန္တလေးမြို့တွင်သွန်းလောင်း၍ ဇန်နဝါရီ ၂၃ ရက်က နေပြည်တော်၊ လက်လုပ်တောင်သာသနာ့ကုန်းမြေသို့ ပင့်ဆောင်ခဲ့ခြင်းဖြစ်သည်။
“မဟာဗောဓိမြိုင်ဆရာတော်ကြီး (၃)ဝါတိုင် သီတင်းသုံးခဲ့တဲ့ လက်လုပ်တောင်သာသနာ့ကုန်းမြေမှာ ဆရာတော်ဘုရားကိုကြည်ညိုတဲ့ ဒကာ၊ ဒကာမတွေ ဆရာတော်ဘုရားကိုရည်မှန်းဖူးမြှော်နိုင်စေဖို့နဲ့ဆရာတော်ကြီးရဲ့ သက်တော်(၈၀)နှစ်ပြည့် မွေးနေ့အတွက် ရည်မှန်းပူဇော်တဲ့အနေနဲ့ လက်လုပ်တောင်ဗောဓိရိပ်ငြိမ်တောရဆရာတော်နဲ့ဒကာ၊ ဒကာမတွေ စုပေါင်းလှူဒါန်းပူဇော်ခဲ့တာပါ”ဟု ဆရာတော်ကြီး၏ တပည့်သာဝကတစ်ဦးဖြစ်သည့် ကိုအောင်ဘိုဘိုကပြောသည်။
မဟာဗောဓိမြိုင်ဆရာတော်ကြီး၏ ပုံတူကြေးရုပ်ထုတော်အား ဇန်နဝါရီ ၂၄ ရက်မှစတင်၍ နေပြည်တော်ရှိ လက်လုပ်တောင်သာသနာ့ကုန်းမြေ၌ အပူဇော်ခံထားရှိကြောင်း သိရသည်။
“ကျွန်တော်တို့လက်လုပ်တောင်သာသနာ့ကုန်းမြေမှာ မဟာဗောဓိမြိုင်ဆရာတော်ကြီးရဲ့ သြဝါဒနဲ့အညီ လက်လုပ်တောင်ဗောဓိရိပ်ငြိမ်တောရဆရာတော်ဦးစီးပြီး နှစ်စဥ် ဝါဆိုလဆန်းမှာတစ်ကြိမ်၊ တပို့တွဲလဆန်းမှာတစ်ကြိမ် တစ်နှစ်ကို ၂ ကြိမ် ၁၅ ရက်တရားစခန်းဖွင့်လှစ်ပေးပါတယ်”ဟု ကိုအောင်ဘိုဘိုကပြောသည်။
