ဇန်နဝါရီလ ၂၄ ရက် အင်္ဂါနေ့ တွင်ထုတ်ဝေခဲ့သော အမေရိကန် နိုင်ငံခြားရေး ဝန်ကြီးဟောင်း မိုက်ခ်ပွမ်ပေယို၏ ကိုယ်တွေ့မှတ်တမ်းစာအုပ်၌ မိုက်ခ်က အိန္ဒိယနှင့် ပါကစ္စတန်ကြားရှိ အခြေအနေသည် ၂၀၁၉ ခုနှစ်တွင် နျူကလီးယားစစ်ပွဲ ဖြစ်ခါနီးအထိ တင်းမာခဲ့ကြောင်း၊ သို့ရာတွင် အမေရိက၏ ကြားဝင်ဖြေရှင်းပေးမှုကြောင့် တင်းမာမှုများ ဖြေလျော့သွားကြောင်း ဖော်ပြထားသည်။
မိုက်ခ် ပွမ်ပေယိုသည် စီအိုင်အေ အကြီးအကဲအဖြစ် တာဝန်ထမ်းဆောင်ခဲ့ဖူးရုံသာမက သမ္မတဟောင်း ဒေါ်နယ်ထရမ့် လက်ထက်၌လည်း ထိပ်တန်းသံတမန်အဖြစ် တာဝန်ထမ်းဆောင်ခဲ့သူဖြစ်သည်။
ထိုသို့ ကြီးလေးသည့် တာဝန်များကို ထမ်းဆောင်စဉ် ကြုံတွေ့ခဲ့ရသော အတွေ့အကြုံများကို မိုက်ခ်က စာအုပ်တစ်အုပ်အဖြစ် ရေးသားကာ “Never Give an Inch” အမည်ဖြင့် မနေ့က ထုတ်ဝေခဲ့သည်။
“အိန္ဒိယနဲ့ ပါကစ္စတန်ကြားက ပြိုင်ဆိုင်မှုဟာ ၂၀၁၉ ခုနှစ် ဖေဖော်ဝါရီလအရောက်မှာ နျူကလီးယား စစ်ပွဲဖြစ်ခါနီးအထိ နီးစပ်လာခဲ့တာကို လူတွေကောင်းကောင်းသိမယ် မထင်ပါဘူး” ဟု မိုက်ခ်က ရေးသားခဲ့သည်။
အဆိုပါ တင်းမာမှုမှာ ၂၀၁၉ ခုနှစ်တွင် ကက်ရှ်မီးယားဒေသရှိ အိန္ဒိယတပ်များကို ပါကစ္စတန် စစ်သွေးကြွများက တိုက်ခိုက်မှုများ ပြုလုပ်ခဲ့ပြီးနောက် ဒေလီက လေကြောင်းတိုက်ခိုက်မှုများဖြင့် ပြန်လည်တုံ့ပြန်ခဲ့ရာမှ ပေါက်လာခြင်းဖြစ်သည်ဟု သိရသည်။
ထိုသို့ တင်းမာမှုများ ဖြစ်ပွားနေချိန်တွင် သူသည် မြောက်ကိုရီးယားအရေးဖြင့် ဟနွိုင်းမြို့သို့ ရောက်ရှိနေသည်ဟု ပွမ်ပီယို က ဆိုသည်။
ဟနွိုင်းသို့ ရောက်ရှိနေစဉ် အမည်မဖော်လိုသူ အိန္ဒိယမှ နိုင်ငံခြားရေးဝန်ကြီးက သူ့ထံ ဆက်သွယ်လာပြီး ပါကစ္စတန်သည် အိန္ဒိယအား တိုက်ခိုက်ရန်အတွက် နျူလက်နက်များ စတင်ပြင်ဆင်နေသည်ဟု သတင်းရထားကြောင်း ပြောကာ ၎င်းတို့သည်လည်း နျူလက်နက်များ စတင်ပြင်ဆင်ရန် စဉ်းစားနေကြောင်း ပြောကြားခဲ့သည်ဟု သူ၏ စာအုပ်တွင် ရေးသားထားသည်။
ထို့နောက် မိုက်ခ်သည် ပါကစ္စတန်စစ်တပ်၏ ဗိုလ်ချုပ်ကြီး ကမားဂျာဗေ့ဘဂျဝါထံ ဆက်သွယ်၍ မေးမြန်းခဲ့ရာ ကမားက ထိုသတင်းမှာ မမှန်ကန်ကြောင်းနှင့် အိန္ဒိယသည်သာ နျူလက်နက်များ ပြင်ဆင်နေသည်ဟု သိထားကြောင်း ပြန်လည်ဖြေကြားခဲ့သည်ဟု သိရသည်။
သို့ဖြစ်ပါ၍ မိုက်ခ်သည် နှစ်နိုင်ငံစလုံးအား မည်သည့်ဘက်ကမှ နျူလက်နက်များ မပြင်ဆင်နေကြောင်း ဖြောင့်ဖြကာ အဆိုပါတင်းမာမှုအား အဆုံးသတ်စေခဲ့သည်ဟု ဆိုသည်။
“အမှန်တော့ နျူကလီးယားစစ်ပွဲဖြစ်ဖို့ ဘယ်လောက်ထိ နီးစပ်ခဲ့သလဲဆိုတဲ့ အဖြေကို ကျွန်တော်လဲ တိတိကျကျ မသိပါဘူး၊ ကျွန်တော်သိတာတော့ အရမ်းကို နီးစပ်ခဲ့တာပါပဲ” ဟု မိုက်ခ်က ရေးသားထားသည်။
Source: WION ၊BBC
