မိုက်ကယ်ဂျက်ဆန်၏ ဘဝအကြောင်းကို ပြန်လည်ရိုက်ကူးပုံဖော်မည့် “Michael” ဟု အမည်ပေးထားသော ရုပ်ရှင်ဇာတ်လမ်းတွင် တူဖြစ်သူ ဂျအာဖာ ဂျက်ဆန်သည် အဓိကဇာတ်ကောင်ဖြစ်သည့် မိုက်ကယ်နေရာမှ သရုပ်ဆောင်သွားမည်ဖြစ်ကြောင်း သိရသည်။
အသက် ၂၆ နှစ်အရွယ် ဂျအာဖာသည် မိုက်ကယ်၏ အစ်ကိုဖြစ်သူ တေးရေးဆရာ ဂျာမိန်း ဂျက်ဆန်၏ ဒုတိယမြောက်သားဖြစ်ပြီး အဆိုပါ ရုပ်ရှင်သည် သူ့အတွက် ပထဆုံးသော ရုပ်ရှင်ကား ဖြစ်လာမည်ဖြစ်သည်။
“ဂျအာဖာက ကျွန်မရဲ့သားကို ပြန်လည်မြင်ယောင်မိစေတယ်။ ဖျော်ဖြေရေးသမားတွေနဲ့ သရုပ်ဆောင်တွေကို မွေးထုတ်ပေးတဲ့ ဂျက်ဆင်မိသားစုရဲ့ အမွေအနှစ်ကို ဂျအာဖာ တစ်ယောက် ဒီလိုမျိုး ဆက်လက်ထိန်းသိမ်းတာကို မြင်ရတော့ အရမ်းကို ဝမ်းသာပါတယ်” ဟု မိုက်ကယ်၏ မိခင်ဖြစ်သူ ကက်သရင်း ဂျက်ဆန်က ပြောကြားခဲ့သည်။
ညီအစ်ကိုမောင်နှမ ဆယ်ယောက်ရှိသော မိုက်ကယ်ဂျက်ဆန်၏ မိသားစု အကုန်လုံးနီးပါးသည် အနုပညာပိုးပါသူများဖြစ်သော်လည်း ထိုထဲမှ မိုက်ကယ်သည် အအောင်မြင်ဆုံး တစ်ကိုယ်တော် အနုပညာရှင်ဖြစ်ပြီး ပေါ့ဘုရင်ဟု တင်စားရသည်အထိ အောင်မြင်ခဲ့သူဖြစ်သည်။ မိုက်ကယ်သည် အသက် ၅၀ အရွယ် ၂၀၀၉ ခုနှစ်တွင် ကွယ်လွန်သွားခဲ့သည်။
မိုက်ကယ်၏ နေရာတွင် သရုပ်ဆောင်နိုင်မည့် လူကို ကမ္ဘာ့အနှံ့ လိုက်လံရှာဖွေခဲ့သော်လည်း မိုက်ကယ်၏ စိတ်ဓာတ်နှင့် ပင်ကိုယ်စရိုက်ကို ဂျအာဖာလောက် မည်သူမှ သဘာဝကျကျ သရုပ်မ ဆောင်နိုင်ကြောင်း အော်စကာဆုရ “Bohemian Rhapsody” ရုပ်ရှင်ကို ထုတ်လုပ်ခဲ့သူ ဂရေဟမ် ကင်းက ပြောလာခဲ့သည်။
Source: The Guardian