ကာလုံအစည်း​ဝေးတွင် ပြည်သူ့လွှတ်တော် ဥက္ကဋ္ဌနှင့် ပြည်ထောင်စု ဝန်ကြီးများ၏တင်ပြ​ဆွေး​နွေးချက်များ

တိုင်းပြည်တွင် အကြမ်းဖက်မှုများ ၊ ဆူပူမှုများနှင့် ရွေးကောက်ပွဲအား ပျက်အောင်ဖျက်မည့် ဆောင်ရွက်မှုများ ရှိနေသေးပြီး တည်ငြိမ်အေးချမ်းရေးနှင့် ရွေးကောက်ပွဲ အောင်မြင်စွာကျင်းပနိုင်ရေးအတွက် အချိန်ကာလ တစ်ခုထပ်မံရယူရမည့် အခြေအနေဖြစ်​ကြောင်း  ကာလုံအစည်းအဝေးတွင် တင်ပြခဲ့ကြသည်။ 

ဇန်နဝါရီ (၃၁) ရက် နံနက်ပိုင်းက ကျင်းပသည့် ကာလုံအစည်းအဝေးတွင် တပ်မတော် ကာကွယ်ရေး ဦးစီးချုပ် ၏ တင်ပြချက်များအပေါ် ပြည်သူ့လွှတ်တော် ဥက္ကဋ္ဌ ဦးတီခွန်မြတ်က ဆွေးနွေးရာတွင် အခြေခံ ဥပဒေဆိုင်ရာပြဋ္ဌာန်းချက်များဖြစ်သည့် ပုဒ်မ ၄၂၅ အားသုံးသပ်ရာတွင် နိုင်ငံတော် ဖွဲ့စည်းပုံအခြေခံ ဥပဒေဆိုင်ရာ ခုံရုံးသဘောထားမှတ်ချက်ကိုလည်း ရယူပါက ပိုမိုပြည့်စုံမည်ဖြစ်ကြောင်း ဆွေးနွေးတင်ပြခဲ့‌ကြောင်း သိရသည်။  

ထို့နောက် နယ်စပ်ရေးရာဝန်ကြီးဌာန ပြည်ထောင်စုဝန်ကြီးက ဆွေးနွေးတင်ပြရာတွင် လက်ရှိကာလတွင် အကြမ်းဖက်မှုများလျော့နည်းလာပြီ ဖြစ်သော်လည်း အချို့သောနေရာဒေသများတွင် ရှိနေဆဲဖြစ်ပြီး တည်ငြိမ်အေးချမ်းမှုရရှိရေးနှင့် ရွေးကောက်ပွဲအတွက် ဆက်လက်ဆောင်ရွက်ရမည့် လုပ်ငန်းစဉ်များ ပြီးပြည့်စုံအောင် အချိန်ကာလ အတိုင်းအတာတစ်ခုအထိ သတ်မှတ်ဆောင်ရွက်ရန် လိုအပ်သည်ကို သုံးသပ်တွေ့ရှိရကြောင်း တင်ပြခဲ့သည်ဟု သိရသည်။ 

ပြည်ထဲရေးဝန်ကြီးဌာန ပြည်ထောင်စုဝန်ကြီးက တင်ပြရာတွင် လက်ရှိအခြေအနေတွင် ရွေးကောက်ပွဲပြုလုပ်နိုင်ခြင်းမရှိစေရန် အကြမ်းဖက်သမားများက အကြမ်းဖက်နှောင့်ယှက်ခြင်း၊ သတ်ဖြတ်ခြင်း၊ ဖျက်ဆီးခြင်းများကို လုပ်ဆောင်လျက်ရှိသည့်အပြင် အုပ်ချုပ်မှု ယန္တရားများလည်ပတ်နိုင်ရန်အတွက် ရပ်ကွက်၊ ကျေးရွာအုပ်ချုပ်ရေးမှူးများ အချို့နေရာများတွင် ခန့်အပ်ရန်ကျန်ရှိနေသေးကြောင်း ထည့်သွင်း ဆွေးနွေးသွားသည်။ 

ထို့အပြင် ကာကွယ်ရေး ဝန်ကြီးဌာန ပြည်ထောင်စုဝန်ကြီးမှလည်း လွတ်လပ်ပြီး တရားမျှတသည့် ရွေးကောက်ပွဲကျင်းပနိုင်ရေးအတွက် အနှောင့်အယှက်ဖြစ်နေဆဲဖြစ်ပြီး ရွေးကောက်ပွဲတွင် မဲစာရင်းမှန်ကန်စေရေးအတွက် လူဦးရေစာရင်းကောက်ယူရေးတို့ကို အနှောင့်အယှက်ကင်းကင်းဖြင့် ဆောင်ရွက်နိုင်ရန်နှင့် အချိန်ကာလတစ်ခု လိုအပ်နေဆဲဖြစ်သည်ကို ထောက်ခံတင်ပြကြောင်း ပြောကြားခဲ့သည်။ 

အဆိုပါ တင်ပြမှုများအပေါ် ကာကွယ်ရေး ဦးစီးချုပ်က ဖြည့်စွက်ရှင်းလင်းတင်းပြခဲ့ပြီး ကာလုံအစည်းအဝေး၏ သဘောတူညီချက်ဖြင့် ဖွဲ့စည်းပုံ ဥပဒေပုဒ်မ ၄၂၅ အရ နိုင်ငံတော်အား အရေးပေါ်ကာလ (၆) လ ထပ်မံ ကြေညာကာ ဖွဲ့စည်းပုံအခြေခံ ဥပဒေ ပုဒ်မ (၄၁၉) အရ နစက အား (၆) လ တာဝန်အရပ်ရပ် ထပ်မံအပ်နှံကြောင်း အမျိုးသားကာကွယ်ရေးနှင့် လုံခြုံရေးကောင်စီက ဆုံးဖြတ်ခဲ့ခြင်း ဖြစ်သည်။