အသစ်ပြန်လည်ဖွဲ့စည်းခဲ့သည့် နစက မှ တိုင်းနှင့်ပြည်နယ် ၈ ခုမှ မြို့နယ် ၃၇ခု အား ဖွဲ့စည်းပုံအ ခြေခံဥပဒေ ၄၁၉ အရ အမိန့်အမှတ်(၁/၂၀၂၃)(၂/၂၀၂၃)(၃/၂၀၂၃)(၄/၂၀၂၃)(၅/၂၀၂၃)(၆/၂၀၂၃တို့ဖြင့် စစ်အုပ်ချုပ်ရေးအပ်နှင်းခဲ့သည်ဟု ဖေဖော်ဝါရီ ၂ ရက်က အသိပေးထုတ်ပြန်ခဲ့သည်။
အနောက်မြောက်တိုင်းစစ်ဌာနချုပ်နယ်မြေဖြစ်သည့် စစ်ကိုင်းတိုင်းရှိ အင်းတော်၊ဗန်းမောက်၊ကောလင်း၊ပင်လယ်ဘူး၊မြောင်၊ဆားလင်းကြီး၊ပုလဲ၊ယင်းမာပင်၊ခင်ဦး၊တန့်ဆည်နှင့်ရေဦးမြို့နယ်၊ ချင်းပြည်နယ်ရှိ တီးတိန်၊ထွန်းဇံ၊ဖလမ်း၊ကန်ပက်လက်၊မတူပီ၊ထန်တလန်နှင့်ဟားခါးမြို့နယ်တို့အား အမိန့်အမှတ်(၁/၂၀၂၃)ဖြင့် စစ်အုပ်ချုပ်ရေးအပ်နှင်းခဲ့ခြင်းဖြစ်သည်။
ထို့ပြင် အလယ်ပိုင်းတိုင်းစစ်ဌာနချုပ်နယ်မြေဖြစ်သည့် မကွေးတိုင်းရှိ ဂန့်ဂေါ၊ထီးလင်း၊ဆော၊ပေါက်နှင့်မြိုင်မြို့နယ်တို့အား အမိန့်အမှတ် (၂/၂၀၂၃)၊တောင်ပိုင်းတိုင်းစစ်ဌာနချုပ်နယ်မြေဖြစ်သည့် ပဲခူးတိုင်းရှိ ထန်းတပင်၊အုတ်ဖို၊နတ်တလင်း၊ပေါင်းတည်နှင့်ပေါက်ခေါင်းမြို့နယ်တို့အား အမိန့်အမှတ် (၃/၂၀၂၃)တို့ဖြင့် စစ်အုပ်ချုပ်ရေးအပ်နှင်းခဲ့သည်။
အရှေ့တောင်တိုင်းစစ်ဌာနချုပ်နယ်မြေဖြစ်သည့် မွန်ပြည်နယ်ရှိ ရေးမြို့နယ်၊ကရင်ပြည်နယ်ရှိ ကြာအင်းဆိပ်ကြီးနှင့်ကော့ကရိတ်မြို့နယ်တို့အား အမိန့်အမှတ် (၄/၂၀၂၃)၊ ကမ်းရိုးတန်းဒေသတိုင်းစစ်ဌာနချုပ်နယ်မြေဖြစ်သည့် တနင်္သာရီတိုင်းရှိ တနင်္သာရီနှင့်ပုလောမြို့နယ်တို့အား အမိန့်အမှတ် (၅/၂၀၂၃)၊ ဒေသကွပ်ကဲမှုစစ်ဌာနချုပ်(လွိုင်ကော်)နယ်မြေဖြစ်သည့် ကယားပြည်နယ်ရှိ ဒီးမော့ဆို၊ဖရူဆို၊ရှားတောနှင့်ဘောလခဲမြို့နယ်တို့အား အမိန့်အမှတ်(၆/၂၀၂၃)တို့ဖြင့် အသီးသီးစစ်အုပ်ချုပ်ရေးအပ်နှင်းခဲ့သည်။
နစက မှ လုံခြုံရေး၊တရားဥပဒေစိုးမိုးရေးနှင့်နယ် မြေအေးချမ်းသာယာရေးအား ပိုမိုထိရောက်စွာဆောင်ရွက်နိုင်ရန် စစ်အုပ်ချုပ်ရေးအပ်နှင်းခဲ့ခြင်းဖြစ်ကာ ယင်း နယ်မြေများရှိ တိုင်းမှူးများသည် အချိန်နှင့်တစ်ပြေးညီပြောင်းလဲဖြစ်ပေါ်နေသည့် အခြေအနေပေါ်မူတည်၍ ကိုယ်တိုင်(သို့)စစ်နယ်မြေမှူးများကို တာဝန်လွှဲအပ်ကာ စစ်အုပ်ချုပ်ရေးအာဏာကျင့်သုံးနိုင်သည်ဟု ထုတ်ပြန်ခဲ့သည်။
စစ်အုပ်ချုပ်ရေးအပ်နှင်းထားသည့် တိုင်းမှူးများသည် နယ်မြေအတွင်း၌ အုပ်ချုပ်ရေးအဖြစ် လုံခြုံရေး၊လူမှုရေး၊ကုန်သွယ်ရေး၊သယ်ယူပို့ဆောင်ရေး၊ တရားစီရင်ရေးအဖြစ် တရားရုံးများဖွဲ့စည်းခြင်း၊စစ်ခုံရုံးဖြင့်စစ်ဆေးခြင်း၊ပြစ်ဒဏ်ချမှတ်ခြင်း၊အတည်ပြုခြင်း၊အယူခံခြင်း၊ပြင်ဆင်မှုလျှောက်ထားခြင်းတို့ကို ဆောင်ရွက်ရမည်ဟု ဖွဲ့စည်းပုံအခြေခံဥပဒေပုဒ်မ ၄၁၉ အရ အမိန့်အမှတ်(၇/၂၀၂၃)ဖြင့် ထုတ်ပြန်ခဲ့သည်။
ထို့ပြင် တာဝန်များထမ်းဆောင်ရာ၌ အထောက်အကူဖြစ်စေရန် စစ်အုပ်ချုပ်ရေးအကြံပေးအဖွဲ့အားဖွဲ့စည်းနိုင်ပြီး စစ်အုပ်ချုပ်ရေးဒေသအတွင်းဖြစ်ပေါ်နေသည့် အခြေအနေအရပ်ရပ်အား နစက ဥက္ကဋ္ဌ ထံအစီရင်ခံရမည်ဟု ထုတ်ပြန်ခဲ့သည်။
