စင်ကာပူနိုင်ငံတွင် အမျိုးသားတစ်ဦးသည် လေးနှစ်ကြာ ခင်မင်ရင်းနှီးခဲ့သည့် သူငယ်ချင်းဖြစ်သူက ချစ်သူရည်းစားဖြစ်ရန် တောင်းဆိုမှုကို ငြင်းဆိုခဲ့၍ စိတ်ဒဏ်ရာရစေမှုဖြင့် ဒေါ်လာ ၂ သန်းကျော် ပေးဆောင်ရန် တရားစွဲခဲ့ကြောင်း သိရသည်။
ဒီဝမ်း ရေးစင်း ဒရုန်းကုမ္ပဏီ ဒါရိုက်တာ ကေကော့ရှီဂန်သည် နိုရာတန် ရှူးမေ က သူ့ကိုရည်စားဖြစ်ရန် ငြင်းဆိုသဖြင့် ဂုဏ်သိက္ခာကျဆင်းစေမှုနှင့် စီးပွားရေးအခွင့်အလမ်း ငါးခုထက်မနည်း ဆုံးရှုံးစေမှုဟူသော စွဲချက်နှစ်ခုဖြင့် တရားစွဲဆိုခဲ့သည်။
ဇန်နဝါရီလ ၂၈ ရက်နေ့တွင် ထုတ်ပြန်ခဲ့သော ရာဇဝတ်တရားသူကြီး၏ စီရင်ချက်အရ မစ္စတာ ကော့ရှီဂန်သည် မစ္စတန်က သူ့အား သူငယ်ချင်းအဖြစ်သာ သဘောထားကြောင်း ပြောခဲ့ပြီးနောက် ဆက်ဆံရေး ပျက်ပြားသွားကာ စွဲချက်နှစ်ခုဖြင့် တရားစွဲခဲ့ကြောင်း သိရသည်။
ကော့ရှီဂန်သည် မစ္စတန်အား ၂၀၁၉ ခုနှစ် ဇွန်လနှင့် ၂၀၂၀ ခုနှစ် ဒီဇင်ဘာလတို့တွင် အသေရေဖျက်ခဲ့သည်ဟုဆိုကာ စွပ်စွဲထားသည်။
သူ၏ ပြောဆိုချက်အရ မစ္စတန်သည် သူ၏ အပြုအမှုများကြောင့် အနှောက်အယှက်ဖြစ်ရသည်ဟူသော မဟုတ်မမှန်စွပ်စွဲမှုများကို ကျယ်ကျယ်လောင်လောင် ပြောဆိုခဲ့ကာ ထိုစကားများကိုလည်း အလုပ်ရှိ အခြားလူများက ကြားခဲ့ရကြောင်း တရားရုံးတွင် လျှောက်တင်ထားသည်။
ထိုကဲ့သို့သော လုပ်ရပ်များကြောင့် သူ၏ ဂုဏ်သိက္ခာ ကျဆင်းခဲ့ပြီး ပြီးခဲ့သည့် နှစ်နှစ်အတွင်း စိတ်ဒဏ်ရာရခြင်းနှင့် စိတ်ဓာတ်ကျခြင်းစသော စိတ်ဝေဒနာများကို ခံစားခဲ့ရသည်ဟု ကော့ရှီဂန်ကဆိုသည်။
ထို့ပြင် အကျိုးဆက်အနေဖြင့် စီးပွားရေးမိတ်ဖက်ငါးခု ဆုံးရှုံးခဲ့ရပြီး ယခုအခါ ဖောက်သည်အသစ်များရရှိရန် ရုန်းကန်နေရသည်ဟုလည်း သူကပြောထားသည်။
မစ္စတန်သည်လည်း ကော့ရှီဂန်၏ ရန်ကြောင့် နေအိမ်လုံခြုံစေရန်အတွက် ဒစ်ဂျစ်တယ် တံခါးစောင့်ကြည့် ကိရိယာတပ်ဆင်ထားခဲ့ရမှုနှင့် ကျွမ်းကျင်သူများနှင့် တိုင်ပင်ဆွေးနွေးမှုများ ပြုလုပ်ရာတွင် သုံးစွဲခဲ့ရသည့်ငွေများကို ပြန်လည်ရယူလိုမှုဖြင့် တန်ပြန်တရားစွဲဆိုထားသည်။
စင်္ကာပူတရားရုံးချုပ်သည် အဆိုပါအမှုအား ဖေဖော်ဝါရီ ၉ ရက်နေ့တွင် ကြားနာရန် ချိန်းဆိုထားကြောင်း သိရသည်။
Source: Daily Mail
