ဂျာကာတာ၊ဖေဖော်ဝါရီ ၂
အင်ဒိုနီးရှားသည် ၎င်း၏ပထမဆုံးသောအစည်းအဝေးကို ဖေဖော်ဝါရီလ ၃ ရက်နေ့၌ အိမ်ရှင်အဖြစ်စတင်ကျင်းပလျက် အာဆီယံဥက္ကဌရာထူးကို စတင်ထမ်းဆောင်မည်ဖြစ်ကြောင်းသိရသည်။အဆိုပါအစည်းအဝေး၌ တာဝန်ရှိသူများသည် ဒေသတွင်းထိခိုက်စေသည့် ကိစ္စများအားဦးစားပေးဆွေးနွေးသွားမည်ဟုပြောကြားခဲ့သည်။
၂၀၁၁ ခုနှစ်ကအာဆီယံဥက္ကဌအဖြစ် အင်ဒိုတာဝန်ယူဆောင်ရွက်ခဲ့ဖူးသော်လည်း ယခုတစ်ကြိမ်၌ အာဆီယံ၏အဓိကပြဿနာအဖြစ်ယူဆထားသည် မြန်မာ့အရေးအပါအဝင်အခြားပြဿနာများစွာကိုကိုင်တွယ်ရမည်ဖြစ်သည်ဟုဆိုသည်။
အင်ဒိုနီးရှားအနေဖြင့် အာဆီယံဘုံသဘောတူညီချက်ငါးရပ်အား အပြည့်အဝအကောင်အထည်ဖော်နိုင်အောင်ကြိုးစားလျက် ၎င်း၏အာဆီယံဥက္ကဌသက်တမ်းအတွင်း မြန်မာ့နိုင်ငံရေးအကျပ်အတည်းပြေလည်စေရန် ကူညီပေးမည်ဟုအင်ဒိုနိုင်ငံခြားရေးဝန်ကြီး ရတ်ထ်နိုမာဆူဒီကပြောကြားခဲ့သည်။
အာဆီယံဘုံသဘောတူညီချက်ငါးရပ်မှာ အကြမ်းဖက်မှုအားလုံးရပ်တန့်ရန်၊ သက်ဆိုင်သူအားလုံးပါဝင်ဆွေးနွေးနိုင်ရန်၊မြန်မာနိုင်ငံဆိုင်ရာအာဆီယံအထူးကိုယ်စားလှယ်ခန့်အပ်ရန်၊အာဆီယံကိုယ်စားလှယ်နှင့် စေ့စပ်ညှိနှိုင်းဆောင်ရွက်ရန်အပါအဝင် ဒေသအလိုက် လူသားချင်းစာနာထောက်ထားမှုအကူအညီများထောက်ပံ့ရန်တို့ဖြစ်သည်။
အင်ဒိုအနေဖြင့် မြန်မာဆိုင်ရာအာဆီယံအထူးကိုယ်စားလှယ်ရုံးဖွင့်လှစ်မည်ဟုပြောကြားခဲ့ပြီး ကျွမ်းကျင်သူများကမူ မြန်မာ့အကျပ်အတည်းသည် တစ်နှစ်အတွင်းဖြေရှင်းရန်မဖြစ်နိုင်ကြောင်းနှင့် အာဆီယံဥက္ကဌပြောင်းတိုင်း အထူးကိုယ်စားလှယ်လိုက်ပြောင်းနေခြင်းသည် အလုပ်မဖြစ်နိုင်ကြောင်းပြောကြားခဲ့ပြီး သက်ဆိုင်ရာအာဆီယံဥက္ကဌနိုင်ငံ၏ ကိုယ်စားလှယ်မဟုတ်ပဲ အာဆီယံတစ်ဖွဲ့လုံး၏ မြန်မာဆိုင်ရာကိုယ်စားလှယ်မျိုးသာခန့်အပ်သင့်သည်ဟုလည်းဆိုထားသည်။
အင်ဒိုသည်လည်း ကမ္ဘောဒီးယားနှင့်ဘရူနိုင်းတို့မအောင်မြင်ခဲ့သည့် သက်ဆိုင်သူအားလုံးပါဝင်ဆွေးနွေးရေးကို လုပ်ဆောင်ဦးမည်ဖြစ်သည်ဟုပြောကြားခဲ့သည်။သို့သော်တစ်ဖက်မှလည်း အရှေ့တောင်အာရှ၏ စီးပွားရေးအကောင်းဆုံးနိုင်ငံဖြစ်သည့် အင်ဒို၏လုပ်ဆောင်ချက်အပေါ်လည်း မျှော်လင့်ချက်မြင့်မားမှုများရှိနေသည်။
နစက ကကျင်းပမည့် ရွေးကောက်ပွဲသည် အာဆီယံအတွက်အဓိကစိန်ခေါ်မှုတစ်ရပ်ဖြစ်လာနိုင်ပြီး အဆိုပါရွေးကောက်ပွဲကြောင့် ပြဿနာပိုမိုမဆိုးရွားသွားစေရန် အာဆီယံက ကြိုးပမ်းရမည်ဖြစ်သည်ဟုလည်းပြောကြားခဲ့သည်။
အင်ဒိုအနေဖြင့် မြန်မာ့အရေးအား ထိထိရောက်ရောက်ဖြေရှင်းနိုင်ပါက အာဆီယံဥက္ကဌအဖြစ်ထမ်းဆောင်ရာ၌ အောင်မြင်သည်ဟုဆိုနိုင်ပြီး အမှတ်ရစရာသမိုင်းမှတ်တိုင်တစ်ခုလည်း ဖြစ်လာနိုင်သည်ဟုဆိုခဲ့သည်။
သို့သော်အင်ဒိုအတွက် မြန်မာ့အရေးသာမက အငြင်းပွားနေသည့်တောင်တရုတ်ပင်လယ်ကိစ္စနှင့် စီးပွားရေးမခိုင်မာမှုများကြား အာဆီယံ၏ဖွံ့ဖြိုးရေးအတွက် မည်သို့ဆောင်ရွက်မည်စသည့်အရေးများကိုလည်းဖြေရှင်းရမည်ဖြစ်သည်။
Source : CNA
